لو ماغلط لادمي ماصار له خبره = والخلق نوعين مكحلها ومعميها
احدن غلط واستفاد امن الغلط عبره = وأحدن ليا من غلط غلطه يثنيها
ومن لاتعلم بصغره مانفع كبره = بقعا تبي واحدن يفهم دعاويها
الناس ماينسلم منها مغز ابره = ماولله تطوّّف الدعوى وتعفيها
اقولها والصبر فيني نفذ صبره = من ناس لولا الملامه قلت اساميها
اخطيت مثلي مثل من ضيّع الدبره = نوبٍ يصوب هدفها ونوب يخطيها
والنفس ماهي بعلى الرديان منجبره = لاصارت معززه من عز راعيها
اضد غارات من يرسل علي سبره = وأعرف رجال الوفاء بمصافح إيديها
وأعرف رفيق السعد بالعين والنبره = أجهد ونفسي علي اللي من حواليها
ياكم عظم انكسر وأقوم في جبره = وكم علةٍ مستعله قمت أداويها
اللي على مدة ذراعي شبر شبره = متكاثرن مدته واسكت وأمشيها
واللي حفر لي مايدري انه حفر قبره = من يحفر لمسلمٍ حفره وقع فيها
اقفيت ياوجيه دون وجيه منثبره = اللي توطي من الهامه معاليها
لكن مرد القلم بيجف من حبره = ولاوراق مع دورة الايام تطويها
واللي تردى معي ماني على خبره = علاقته عفتها عن بكرة أبيها

ماجور ياجفـن ٍ جفـاك الرقـادي = شفت السهر وشلون غير ملامحك
توجر ترى لوالسهر فيـك سـادي = خل السهر للي هوا السهر يشرحك
الجرح من ناس ٍ بعيديـن عـادي = القهر يوم ان اقرب انسان يجرحك
لابديت له قدره بـدا فـ التمـادي = وامن الغرور ابملمح العين يلمحـك
لاصرت تدرى خاطره با جتهـادي = اللي بقلبـه بـه لسانـه يوشحـك
يابن الحلال اعقل ترى القول زادي = اليا متى تطعن بظهري وأسامحـك
يا الاجودي لايطول معي العنـادي = ماني بعاجز من عيوني لاأطيحـك
انا صديقـك وان تحـداك حـادي = ونصيحك المخلص بفقدان ناصحك
وحرن على كفك بوقـت الهـدادي = مضرب مخاليبه جزيلـه تفرحـك
بس انتبه واسمـع كـلام المنـادي = اللي دعاك وبالحقايق امصارحـك
وليتك أتغيـر خفتـك بالركـادي = ولايغرك اللي منسدح ميتن ضحك
ضحكه ترى له قصد فيك ومرادي = ليا حقق اهدافه بيسـراه طوحـك
وانته لو اعتزته ضرب فيك وادي = اليا اغتتى مايعرفك لـو يناطحـك
لو أنت صياد الكواسر تصـادي = وتبلش بعمرك من يعالج جوارحك
وإنسان ذا فعلـه جـزاه البعـادي = وتعويض عرفه في عزيز ٍيصافحك
وانشد ترى النشّاد ما قيـل غـادي = أسأل وتلقى مـن يدلـك مصالحـك
ركز وفرّق في بيـاض وسـوادي = ربن خلقك أعطاك عقلٍ يرجّحـك
ما قلت لك عندي عليـه استنـادي = وأختر لنومك جنبك اللي يريحـك

البارحه هب النسيم وكل غيم انزاح لي = وأنا ليا هبت هبوبٍ من شمال ارتاح له
بالمرقب اللي كل ماجيته بسط مرتاح لي = اليا رقيت ونقّض جروحي وصدري فاح له
لو كان يقدر كان ماجيته بنفسه راح لي = لكن به مشغوف وأجي له وأشد الراحله
رقيت فيه ولجت ضلوعي وجاله ناح لي = وجلست وعيوني ترقّّب كل ماينباح له
وعانقت مع ريحة نسيمه كل وردٍ فاح لي = وأغرورقت عينٍ ثلاث عقود ماني كاحله
وأنا رجل ماتشره الدمعه على مكاحلي = لو كل دربٍ من دروب الهم صوته صاح له
شاعر ليا هزيت غصن الشعر طلعه طاح لي = الصلب من صعب الكلام اليا هرج ينساح له
والجمه اللي دلوها لاجيت ماينماح لي = عيبٍ عليّ اقف على جاله ونفسي باحله
وأن كان ماغنى لي الذواق والا صاح لي = ماني من اللي كل عثره بالطريق تزاح له
والبارق اللي نوض برقه يوم يبرق لاح لي = ناقف على جرة سحابه بالقفور القاحله
إما نحقق هقوة الهاقين والمداح لي = والا وقفت معذراً نفسي ورجلي واحله
واستعذر اللي كل ماهيجنت كفحه شاح لي = مادام قدمت العسل والشهد من مناحله
وعزفاً على الضلع الصغير ابو الهيام الناحلي = ابو الطموح اللي يجي كل الصعاب اطماح له
احمّله حمل الجمل ويشيل ماقال آح لي = وأستودعه كنزاً ملكته ضخم لامفتاح له
لولا عيون الشعر والمدّاح والجن احلي = ومجالسٍ تزخر بناسٍ كلها فطاحله
ماجيت هقواتي بحر لامر موجه ساح لي = غنيت له يالساحل الغربي وغنى ساحله

مجهود خرافي وأكثر من رائع يا سالم وقد احتويت الحلقات من جميع الجوانب نقلا وتحليلا وصوتيا وكتابيا فلله درك

وليس غريب عليك هذا الإبداع فهو أحد مجالاته التي يتقنها ويهوها

المتابعون لهذا البرنامج عن طريق ماتطرحه أخي سالم هنا في منتديات النخبة منتديات الموازين الرسمية

المشاركة الأصلية كتبت بواسطة الرمح (المشاركة 390804) مجهود خرافي وأكثر من رائع ياسالم وقد احتويت الحلقات من جميع الجوانب نقلا وتحليلا وصوتيا وكتابيا فلله درك وليس غريب عليك هذا الإبداع فهو أحد مجالاته التي يتقنها ويهوها المتابعون لهذا البرنامج عن طريق ماتطرحه أخي سالم هنا في منتديات النخبة منتديات الموازين الرسمية