أخطيت ، وأكبر من خطاك إعتذارك = وشلون تخطي وأنت فاهم و داري
من زلتك ينقص غلاك ووقارك = لو العفو من شيمتي وإختياري
هذي يمينك مثل ماهي يسارك = صافحتني بـ يدين مثل الشباري
الكذب طبعك والخطيه شعارك = ياكثر مادمح وأتحاشى وأداري
خليتني مابين بردك ونارك = ماباقي إلا أبيع هيبة وقاري
إن كان حطّيت الخطا بـ اعتبارك = قلي بـ ربك من يرد إعتباري
لا صرت ماتحسب حساب إختيارك = خلاص أبرحل وإجتهد بانتظاري
هذي نتيجة ما صدر من قرارك = وأنا أتحمل مايجي من قراري
لاتعتذر لي مايفيد اعتذارك = لاصرت تخطي وأنت فاهم وداري