محاوره اكثرمن رائعه
ابوهاجوس + ذيب سحمه
صح السنتكم وبيض الله وجيهكم

اثرك ياذيب سمحه ضاوين من عصر = اتدور الليله اللي غايبن نورها
مادام باشة مصر متربعن في مصر = بتبات جيعان وانته من ورى سورها

ياصحابنا دام أبو هاجوس عنده بصر=بعض الأوادم يزين القاف بحضورها
مير البلا كان راع العلم عنها قصـر=ما اسامحه وأحذفه في غبه بحورهـا

ياذيب عينك مطاولها العنـا والسهـر=وانته تدور مـع العربـان ميسورهـا
لكن حسني مبارك صـار علـة نحـر=هيمن على مصر واخلف نص دستورها

أنا خويك ليا منـك نويـت السفـر=عسى الله يجيب مستوره لمستورهـا
ماهي جديده لها سنتين وأضرب شهر=وأضيف خمسين من دارت بمديورها

كانك خوييي نبى نسبح بغبت بحر=خلك يميني وانا سواق بابورهـا
دنياك ياذيب ماتخلوو وفيها عبـر=جيعانه اصقورها شبعانه انصورها

اللي على جرتي يمشي يقـص الأثـر=الذود درهـم وقـدم الـذود مقهورهـا
ان ماوصلك الخبر بعطيك علم وخبـر=أخبط غصون الشجر ويطير عصفورها

اللي يقص الاثر صارت عيونه حمر=يبيع بيض الرماح ويشري اخصورها
الددسن اللي مع السكه قفاها الهمـر=يدفها ليـن قـام يحـن ماطورهـا

اللي شرب من بحر واللي شرب من نهر=سود الليالـي يشيـب الـراس سيورهـا
أنا أحسبنك يا ابو هاجوس تنحت صخر=وأثرك في دمثه صلف الهـوا يثورهـا

ياذيب مش القدم ياذيـب مـد النظـر=مايقطع الدرب عرج الناس مع عورها
انحت ضخر وان بنيت ابنايتي من حجر=لكن اداري ضروف الناس واشعورهـا

.