حبر المشاعر لا زهم بيض الاوراق = على صفا رجم القصايد نثرته
عسى الصفا يحرز عن الصدر لا ضاق = لاضاق من همه وانا ماقدرته
يارجم ترجم كان خانتك الافاق = قل للصخر ينطق وش اللي صخرته
علمهم انك تنتظر شمس الاشراق = وانا شروقي من سنين انتظرته
لو ادري ان الوقت خاين وبواق = عمري على درب العنا ماعمرته
ان شفتني مابين ضحكه وترياق = ارسم بها كذبة فرح ماشعرته
يارجم انا بعطيك موجز للاعماق = واقع بصدري في صفاك اختصرته
يمكن تناصفني شعوري وينطاق = والا إعتبر يارجم كان اعتبرته
صدري من الضيقه غدا كنه عراق = همٍ يزعزعني وهمٍ قبرته
والخاطر اللي من طواريه ماراق = سما وصفوه يشتكي من غبرته
يارجم حملتك من الحمل ماطاق = عليك منجوب القصايد نحرته
وانا لي الله كل ماخاطري ضاق = صليت مع صوت الاذان وشكرته