المحاورة بتاريخ 15-16/4/1431هـ

علي حميدان
سـلام تسليمـة وفـا عنوانهـا غبـة بحـر=تنصا الرجال اللي على الزله وساع اصدورها
اربط حزامك يالعقيلـي وخـذ تذكرةالسفـر=فالليله اللي في سماهـا ماتطيـر اطيورهـا

عبدالرحمن العقيلي
دام البقا بك ياالمرحب عد ماهل المطـر=رديةٍ تضفي على الغياب قبل حظورهـا
احزامنا مشدود دون انذار من طول العمر=قدام بعض الناس تتعلم ويبـداء دورهـا

علي حميدان
سلمت واشوفك تجاهلت السلام بلاعـذر=وهاذي ترا ماترضي القلطه ولاجمهورها
شوف المطيه يالعقيلي حملها فوق الظهر=وانا مسكت اشدادها ونته تلمس كورهـا

عبدالرحمن العقيلي
الجود من وجد المكارم واشهدو يامن حظـر=مال الاوادم لا وفاها المـوت غيـر قبورهـا
وان طعتني راجع ضميرك واترك الدرب العسر=ماكل سباحٍ يعـرف يعـوم غـاص بحورهـا

علي حميدان
انته بنيت ابناية(ن)من طين ماهي من حجـر=وانته تروعك الذياب اللـي تعشـا سورهـا
وانكان ماتدري وش اللي صار مع زيد وعمر=بعلومك اللي ماتثمنهـا جرحـت اشعورهـا


عبدالرحمن العقيلي
الا بنيت قصور تاتبقى على مر الدهـر=تموت عكفان الشوارب ماتعدى سورهـا
اقوم مثل المسلمين الفجر واصل الفجـر=وكل الرجال اللي تعاندني مطاوع شورها


علي حميدان
انكان لك وجهة نظر حنا لنا وجهـة نظـر=دستورنا القـرآن والعالـم لهـا دستورهـا
خابرك ماتترك صلات الفجر وعمالك صفر=وانا لاشفت ابطون خلق الله عرفت اظهورها


عبدالرحمن العقيلي
ارفع يدينك لافقدتك فوق عن لفح الجمر=علتك معروفة ومفهومة وانا دكتورهـا
اعرفك رجالٍ تعاف النوم وتحب السهر=تسري على نور الثريا وتستدل بنورها

علي حميدان
يالكاتب اللي رشحوك الناس ريس مؤتمـر=تحرم علي اللقمه اللي سكـرت حنجورهـا
انته بشر لاكن اشوفك مـا تنـازل للبشـر=والشجره الخضراء من القمه نزل عصفورها

عبدالرحمن العقيلي
يالشاعر اللي وصلك شعرك ليا سطح القمـر=ان عيت المكرة تدور تعرف تمشي سيورهـا
ماهوب انـا راع الكبـر لاتتهمنـي بالكبـر=وان شفت كسرٍ في بني عمي جبرت كسورها


علي حميدان
الضحكه اللي قدم وجه الرجل وتقص الظهر=مارجعت عنك النشاما لاعطتك انحورهـا
والكلمه اللي قلتها من تحتها خط(ن)حمـر=اليا متا تضحك على عمي العيون وعورها

عبدالرحمن العقيلي
يقولها اللي لانوى له يمـةٍ عنهـا قصـر=ناسٍ تحسب الحكي ذا ممكن يدس قصورها
ياراعي الخط الحمر اقدم ترا دربك خضـر=قدمك حياض الموت ملزومٍ عليك تزورهـا

علي حميدان
الله يصبرنا على الدنيا ويلهمك الصبـر=ولا ترا الفتنه من المغرب تفوح اقدورها
انا ليا مني قدمت اعميت عميان الفكـر=خليتها تلعن ليال العولمـه وشهورهـا


عبدالرحمن العقيلي
لاوالله الا ساقك الله لي وضـواك القـدر=قدامك الجنة تشهد كـان تبغـى حورهـا
مالك علاج السم راهي فلعروق ومنتشـر=ماعاد يطلع منك لين الارض تجفا بحورها

صح لسانك أخوي الشاعر على حميدان الدجيما
صح لسانك أخوي الشاعر عبدالرحمن العقيلي

المشاركة الأصلية كتبت بواسطة علي حميدان الدجيما (المشاركة 278445) سلام تسليمة وفا عنوانها غبة بحر=تنصا الرجال اللي على الزله وساع اصدورها اربط حزامك يالعقيلي وخذ تذكرةالسفر=فالليله اللي في سماها ماتطير اطيورها

المشاركة الأصلية كتبت بواسطة عبدالرحمن العقيلي (المشاركة 278467) دام البقا بك ياالمرحب عد ماهل المطر=رديةٍ تضفي على الغياب قبل حظورها احزامنا مشدود دون انذار من طول العمر=قدام بعض الناس تتعلم ويبداء دورها