ياطول ليل الفـراق وياكبـر جـوره =ايامنـا غيّـرت .. حتـى طبايعـنـا
في يوم غابت نجومه وانطفى نـوره =مدري وش اللي حصل لكن توادعنـا
لو تدمع العين من فرقـاك معـذوره =الدمع وش قيمتـه لـولا مدامعنـا .؟
القلب مشتاقلـك والنفـس مقهـوره =صحيح بعض المواقف مالهـا معنـا
احلامنا من هـذاك اليـوم مكسـوره =وظروفنـا للمواصـل .. ماتشجعنـا
سود الليالي خـذت منـا ومشكـوره =احلامنا والغـلا واللـي بقـى معنـا
اليوم انا شاعـر ٍ ماحـس بشعـوره =ماهمـه الا البعـاد اللـي ملوعـنـا
انا معك و اجمل اللحظـات مذكـوره =ايـام كانـت .. محبتنـا .. دوافعنـا
شفني وشوف المشاعر كيف مجبوره =أدوّر الفرصـه اللـي معـك تجمعنـا
غلاك للحين ماهز الجفـا .. سـوره =ليله من الذكريات .. ومـن مواجعنـا
اللي خذاني معك بالصوت والصـوره =ان كان يقـدر يرجعنـا ... يرجعنـا
لو كان لك قلب مثل الصبح وزهـوره =ما ضاق حلم الليالي فـي شوارعنـا
لابد الأيـام تاخـذ بالزمـن .. دوره =وتقولي وش حصل ؟ واقولك .. ضعنا

صح لسان كاتبها ..


يعطيك العافيه جبر الخواطر..