مرحبا وين المعزب يالمعزب يالمعزب=اقرب اقرب وين رأسك لاتذل ولا تونا
تالي الوقت ابتلشنا بالمعرب والمعرب=مير جعل الله يغفر ذنبنا ذا الليل عنا

لاجفتك الدار شرق يالعريقي ثم غرب=عس الأرض وسيلها وأفرق ضعنكم عن ضعنا
موترك بنشر سبيره والرديتر قام يهرب=اركد اركد لا يطول الدرب فيك وثم تعنا

يابن سحمه خلني منك اتوكد واتقرب =لاتهدمون البيوت اللي على العزه تبنا
طيع شوري لاتخربها وحنا مانخرب=عندنا شلفا ذياب وعندنا الرمح المطنا

البيوت الهامده وسقوفها ماها يسرب=خلها وأزبن بيوت العز يالذيب المعنا
البعير المبتلى لامن هدر عيا يضرب=لا سمع صوت الفحول اللي وزانه يرزمنا

كيف ابا احلب المنيحه ديسها ياذيب صرب= والله انا ماكلينا من صحن ماهو صحنا
التيوس ليا اونست ضرب العصا قامت تطرب=وانت لازم تحسب حسابك وتبعد عن وطنا