بسم الله الرحمن الرحيم
قصيده مهداه من قبيلة السمره من عتيبه
لعوانيهم الهناشله من الموازين من مطير

سلام منا كلنا للموازين=وايضا لحمران النواظر عمومي
ويعم كل الحاضرين الوفيين=من دون اسمي والكلام إمعلومي
وخص الهناشل والهناشل عزيزين=سلايل اللي يكسب المجد دومي
تسليم ترجح له ثقال الموازين=لاسمعه المهموم ينسى الهمومي
قلته بأسم ناصر طليق الحجاجين=شيخٍ يمثل فألمهمات قومي
شيخ القبيله فالقساوه وفاللين=يسد اللي مايسد مخدومي
والشيخ محسن والشيوخ معروفين=اهل الاشدّه قبل عصر الختومي
جينا على دعوة عيال احمر العين=اللي لهم حقٍ علينا لزومي
دعيوا ذوي كامل وجينا على الزين=مع مذخرة من يوردون السهومي
اللي لهم عند العرب ماغدا دين=بالطيب مقسمهم خيار القسومي
ربعي ذوي كامل زحولٍ حشيمين=اهل الصويّتيات واهل العزومي
من حين جاء الداعي حضرنا ملبين=للدعوه اللي وجهوها القرومي
وهمه بنيخينا ومنا قريبين=والواجب ان مواصلتنا تدومي
وانتم وحنا كلنا حسبة اخوين=مابيننا فرقٍ يكود الوسومي
ماتاسمون وسومنا ومتساوين=بأفعالنا وطبوعنا والسلومي
وليا بدأ لكم لازمٍ مستعدين=كبيرنا وصغيرنا لكم يقومي
وان جاء لنا لازم تقومون عجلين=مقام ربعٍ ماتجيه الوهومي
وانتم غنيينن وحنا غنيين=وادري بكم ماتجهلون العلومي
ولاهوب حق غيابنا عنكم إسنين=ولحدٍ برئ من الزلل ومعصومي
وانتم بعد عنا من اسنين مبطين=والوصل فرض من الغفور الرحومي
والواجب انّا نقتدي بالقديمين=منّا ومنكم والمواصل يدومي
واذكر عماش القرم سقم المعادين=اللي لجزلات المراجل يشومي
راعي فعولٍ يتعبن المسمين=عز الرفيق ومتعبٍ للخصومي
للطيب في وجهه رسوم وعناوين=صميدعٍ عند الجميع محشومي
يوم السمره بطرشهم جوه مضمين=في حامي الكنه ولفح السمومي
فرز لهم ومطير لأمره مطيعين=تقدير ماجاب لهم امرٌ حكومي
وان جا خواله بالوفاء له حريصين=لوهو غناوي مايروح محرومي
مقدرٍ تقدير عند الذويين=ويشوم للعليا وهي له تشومي
ويرسي كما ترسي هضاب الدياحين=ماهوب غصنن قدم الارياح يومي
وغير الشجاعه والسخا العرف والدين=غفر له الله يوم نحشر لمومي
وعماش عقب له كرامٍ متاقين=للطيب مثله عاصبين الكمومي
مايحتدون يسار ممشاهم أيمين=حرار مبداهم طوال الرجومي
وكل الهناشل كاسبينن ونعمين=ويقال صح ان قلت عشرة إنعومي
هذا اختصار ولابقى غير بيتين=اقولها وابغى الكلام محكومي
لنا طلب مير اسمعوا يالكريمين=ماهو طلب لاوالله امر إمحسومي
نبغى وعد منكم وتحديد هالحين=على كرامه والجميع إمعزومي
هألحين قولوا تم مافيه علمين=والعذر منّا يالحشام إمعدومي
مال العذار اللي تقدم براهين=عنكم مثل بعد القمر والنجومي
عزيمه إلكم من خوالٍ محبين=محبةٍ ماجت بليله ويومي
اعزم بأسم ربعٍ على الطيب ضارين=وارفع بهم راسي ولافيه لومي
والله يصون إلنا بلاد الحرمين=وزعيمنا اللي للعداله يرومي
واخوانه اللي معه بالطيب ماشين=حكام نجد محققين الحلومي
اللي ولانا لهم ثبت بالقوانين=وجنودهم حنّا بوقت اللزومي
مبايعين لهم وبالعهد موفين=ماينقض البيعات غير الظلومي
والختم صلى الله على ازكى النبيين=شفيعنا يوم القيامه تقومي

المشاركة الأصلية كتبت بواسطة ميزان الحق (المشاركة 275710) ماهي غريبة على ربعنا الهناشلة ومقامهم يطلق الوجه والله يبيض وجه الشيخ عبيد الهنشل وكل جماعته مطلق دعيج أسمع به بس مادريت إنه من الهناشلة كيف أحصل قصيدته وياليت تستضيفونه يابن مصاول قريت له قبل فترة وصراحة شاعر ماعليه كلام