وينك يا ابو مازن صحيبك غدا ملح = وضاعت علومه بين صبح وعشية
انا الذي ما كان يتعبني الجرح = وما كنت احسب حساب هذي وذيّة
مثلك وخابرني ليا مسني قرح = أضرب على الكايد وأحث المطيّة
واليوم همي هم والبال سارح = وضاقت عليّه نجد نجد العذيّة
ما طاب لي نومٍ ولا طاب مطرح = تقفي هواجيسي وتقبل عليّه
من عـلـةٍ في خافقي صرت شاطح = أهيم وأسرح في كثير وبليّــة
يا حضرة الدكتور لا تكثر الشرح = انا من امس العصر شين السجيّة
تشرح لكن البال يسرح ويمرح = وما عاد لي فالشرح ذرة شهيّة
وإذا شطحت شوي قال : أنت ؟ صحصح = ولا ترى سويتها لك قضيّة
وأصبحت من بين الثنينا متنّح = بليّة ٍ يا كبرها من بليّة
وأخذت لي من بعدها فالزمن ردح = هذي سواتي بين روحة وجيّة
مدري يا أبو مازن هذا القلب يمزح ؟ = ولا صحيح أنه على صدق نيـّــة !

نـايـف الـعـضـيـلـة

المشاركة الأصلية كتبت بواسطة مواعيـ سراب ـدك (المشاركة 444158) صح لسانك اخوي المعنى على القصيده الجزله ونعم فيك وفي ابو مازن وبيض الله وجهك ويعطيك الف عافيه .. وبنتظار كل جديد منك

المشاركة الأصلية كتبت بواسطة دمعــــة غــــلاآآآ (المشاركة 444170) صح لساااااانك ويعطيك ألف عاافية .. لا تعليق.,, وأخلي الانقادات اذا وجدت لاصحابها تحياتي..:049:

المشاركة الأصلية كتبت بواسطة راشد العبداني (المشاركة 444171) صح السانك اخي / نايف وبانتظار مزيدا من الابداع دمت على الخير

المشاركة الأصلية كتبت بواسطة أبن مصاول (المشاركة 444243) قصيدة جميله اخي نايف وتضاف الى رصيدك الشعري ولفت نظري تغيير قافية الصدر وهو ليس بعيب لأن الصدر دائماً لايوجد قانون يلزم الشاعر فيه بحرف معين ولكن وبما انك أستمريت على أحرف معينة في الأبيات الأولى "ملح,جرح,قرح" فالمفروض أن تستمر على نفس ميزان الكلمة حتى النهاية لكي يضاف جمال الى جمال القصيده... ومع ذلك أنت مبدع في كل حالاتك

المشاركة الأصلية كتبت بواسطة شلاحية مطنوخة (المشاركة 444337) ياسلام ياسلام صح لسانك يا نايف .. ولاهنت على هالوجدانية العذبة .. ولو اني أشارك أخوي ابن مصاول بالملاحظة .. لكن لا تبخل علينا بما في جعبتك ..