منتديات الموازين الرسميه - قصيده للشاعر سعود عالي الجش

هذه القصيده للشاعر والاعلامي سعود بن عالي الجش وقد القاها في ملتقى بني عبدالله الثالث المقام عند ابن سقيان

وكثر الجدال والمعارضات حولها وتقرر منعها من البث على القنوات الراعيه للحفل

والقصيده تتكلم عن موضوع معين وانا اشكر ابو سلطان على هذه الرساله الجميله

واليكم القصيده

ابدا بذكر الواحد القهار غفار الذنوب = الله يوفقنا ويهدينا على درب الرشاد
يالله ياعلام مابالكون من سر الغيوب = خلقت مافي الكون كله ثم كرمت العباد
تجعل لنا حظ ونصيب بيوم غالب ومغلوب = حنا نجاهد في سبيل الله والدنيا جهاد
والناس كلن له طبيعه في الحياه وله اسلوب = والله بلاء بعض الاوادم بالمكابر والعناد
رجل محسوب مع الرجال ورجل ماهوب محسوب = ماله صباح مع الصباح ولاهجاد مع الهجاد
وبعض البشر ماهوب لامبغض ولاهوب امحبوب = ابن حلالن في زمانه لابياض ولاسواد
وترا ثقيل الوزن يثبت مايطير مع الهبوب = اللي تطير ابه الهبوب يروح تاليه النفاد
يامولعين النار لو النار شعلتها شبوب = النار لو شبت وكبرت راح تاليها رماد
والكذب مايرفع مقامك لو تكذب يالكذوب = هذا الصحيح ليا بغيت الصدق والعلم الوكاد
قدمتها برقا وزرقا وانت مانته بمغصوب = واصبحت مثل الهامل اللي مايساق ولايقاد
واللي يتوب عن الخطايا احسن من اللي مايتوب = حنا نشوف الخير زاد وشايفين الشر زاد
ولافيه رجالن سليم من الخطايا والعيوب = من عصرنا هذا الحديث الى ثمود وعصر عاد
والناس ماتكسب رضاها لو تجي من كل صوب = يبغون جوً معتدل ماهوب حر ولا براد
قام النمر يمشي مع القطعان ماهوب مهيوب = حتى البشر تغيرت فالوقت والمسيود ساد
قال الاسد للذيب انا ياذيب فضلت الهروب = يمكن علي القصه الاولى مع الثعلب تعاد
قامت خفافيش الظلام تطير قدام الغروب = وقامت مخاليب الفراش اتطق في رؤؤس الجراد
كلن يقول الحق عندي مير هبي ياهبوب = حتى الثعل ضوء على الرعيان وسنونه حداد
والحر الاشقر منتهي واصبح مهّد ومعصوب = والطير الابرق والغراب يهد في وقت الهداد
يشبه كثير من البشر من كل حدب و كل صوب = وصدق لياقلت لك هذا النوع في كل البلاد
الناس تنضر للمناصب خص والا للجيوب = ولاحدن مفكر في زمان العولمه والاقتصاد
ان صار عندك قرش يمشي معك في دربك قروب = وفي كل يوم يصير لك خدام واصحاب جداد
الظاهر ان الامر هاذا صار في كل الشعوب = ان مات تاجر امكن يسوى على قبره حداد
هذا وانا شاعر واغني بالشمال وبالجنوب = ولالي شغل لوقالوا اني هايمن في كل واد
الحمدلله مايضيقن المساعي والدروب = ان عودت للشعر انا راع المطيه والشداد
رجال عن ربعه ينوب ورجل مايقدر ينوب = بالماقف الغصاب يرمي السرج عن ظهر الجواد
وسفينه الجهال مالي في كبينتها ركوب = ان سافرت فاول جماد معوده بأخر جماد
وهذا الكلام اوجهه واخص عميان القلوب = كلن يبي يجني من اللي زارعه وقت الحصاد
والسالفه لبستها بشت ومعه دقله وثوب = ولاحد بعارف مايكن الشخص في وسط الفؤاد