حبيب العازمي :

مرحبا ترحيبة ٍ تملا الصدور من الحفاوه=والحفاوه للضيوف ابدا من الماء والطعامي
يا ضميري لا تجيب من الكلام الا النقاوه=والنقاوه صيدة ٍ ما يرتميها كل رامي


عبدالله الميزاني :

البقاء فالشاعر اللي فيه شي من البداوه=نوب يمشي بالنظام ونوب يلعب بالنظامي
انت ليش تصاحب الحرّث على شان العلاوه =البدايه من فوادي والنهايه من سلامي


حبيب العازمي :

انت ياللي تفتح المصحف وتبطي بالتلاوه =يوم تسرق لك ضعيف ويوم تسرق لك حرامي
ياطبيب الجرح كب الجرح والا زيد داوه=لو فقد العقل ما اضيع رصاصه من حزامي



عبدالله الميزاني :

عام الاول حلو مير اليوم ضيعت الحلاوه =يا بيوت الطين وبيوت الشعر وين الخيامي
خابرين ازرق سماوي ما يعرف الا السماوه=يا ختامة خير ليش الناس تزهم بالاسامي


حبيب العازمي :

ما بقي لك غير يوم ونص من وقت الشقاوه=حط راسك فالقلص والا نحطه فالخطامي
الفلبيني يموت ولا ترك لحم القطاوه=والقطاوه فالشوارع لا تباع ولا تسامي


عبدالله الميزاني :

انت رجال ٍ موظف تعتبر هذا علاوه =بس انا اكسّر عظام الناس ما تكسر عظامي
ليه فيك من التعصب ليه فيك من الهداوه=وانت حامي والحديده ما تجوز لكل حامي


حبيب العازمي :

الفقيه اللي يبى يظفي على قلبه غشاوه =يالله استر لا يخلينا على غفله عدامي
لو امشيها تروح لخالي عبدالله ضراوه =مير ابا اكحّل عيونه لين تعذر فالمنامي



عبدالله الميزاني :

انت ما جيت الفضاء و أول سبب فيك الفضاوه=مايجوز تناشد العشاق عن تبع الغرامي
السلوم الها غلاوه والعلوم الها طراوه =بس ما قسّم عيال الناس غير الانقسامي


حبيب العازمي :

انت عالم فالهوا لكن من هاواك هاوه=روح رد الورد يم الشام وأصل الورد شامي
قفلو باب الصداقه وافتحوا باب العداوه=يالرجال اللي تحسبون الخصف ريش النعامي


عبدالله الميزاني :

انزل البحر الحمر واطلع على راس النزاوه=بس لا يدري بطرقتك العصيمي والزلامي
انت فله جوف فله بس ما انت من الفلاوه =كان شفت احطام غيري لا تحسب انه حطامي


حبيب العازمي :

نظرتي فوق الجبال ومنزلي فوق النباوه =روح دور واحد ٍ صاحي ويلحقني ملامي
اركضوا ركض الحصن والا اركضوا ركض الفلاوه=انتها مرباع نجد وباقي الخبت التهامي


عبدالله الميزاني :

انت تحزني على ما اشوف فيك من الغباوه =واخذ من تقدير غيري واخذ شي من احترامي
افضل النخل الطوال المعتبر والا الجناوه=والدروب طوال ما تنجون والديره مضامي


حبيب العازمي :

اشهد انك شاعر ٍ صاحي كذا ما من صحاوه =يوم تسوى لك فريق ويوم ما تسوى مقامي
دور اللي طول طولك ثم دفه وسط ساوه=عايش الدنيا يموت وطلبته حسن الختامي



عبدالله الميزاني :

نوب تقطعها صليب ونوب تربعها شهاوه=والثمامه ما نجي فيها على شان الثمامي
انتهى عهد الخوان اللي يعرفون الاخاوه=واختفت شمس النهار ولابقي غير الظلامي


حبيب العازمي :

والله اني ما اعشق الدنيا وخابرها دناوه=وانت اشوفك تطرق الابواب وترد السلامي
خلها تمسي وترسي من عماوه في عماوه=لو تطيب من الجرب زمل العرب جاها الهيامي


عبدالله الميزاني :

اشتر الجاوي من السيل الكبير وروح جاوه=فيك جهدي ظاع كله ما يفيد الاغتنامي