الهاجس اللي طرالي مبتدي بالله = والعز والخير والخيره بتذكاره
سرياقلم واكتب التعبير بسم الله=مثل الذهب في تصاميمه ومعياره
يابوبدر مانجيب ابيات حي الله =والسالفه كلها ترويح وعباره
بلاش من رحلة (ن) لينبع ياعبدالله= الوضع حساس والأيام دوّاره
ليتك تعذرت ولاقلت لاوالله =والعذر مقبول من عريف عذاره
وأبو بدر لوحلف لي من كتاب الله= انه خويك يلف الجيب بالطّاره
قالولي ان الحريري زار نصر الله= وكلٍ يصوت على الترشيح بأنصاره
ثم سارت القافله تمشي ياماشالله=من الشرق متوجه للغرب بزياره
مدري وش اللي حصل في جيش حزب الله=عقب الهجوم وتقدم صابته غاره
وانا اعرف ان القدر والغيب بأمر الله=والآدمي ماخفى شي من اسراره
ماني بمغبون والأرزاق عندالله=لكن حق الخوي مقرون مع جاره
جيبي معي واقطع الجوبه مع ارض الله = وليا بغيت الخوي دوّرت واختاره
كم ديرة(ن) جيتها ويدوم سترالله =مابين رمل وجبل واحيان مع قاره
وشبيت ناري بها وصليت فرض الله = وسويتلي كيف من هيله ومسماره
وهالحين كلٍّ على كيفه بأمان الله = يصلخ ويطبخ وقدر الكبش من ناره
سر الهوىا بالهوىا خافي ياوجه الله = طاير مهو طير ولاشكل طياره
لواني اصنع جبل مارضيت خلق الله= قالولي انه يلف يمين ويساره
لكن بصبروجامل حسب شرع الله = ومثلي رياجيل بالوفقات صباره
كله على شان أساهم في سبيل الله = مهدف على مال برياله ودولاره

البارحه دق هاجوسي ياعبدالله = وامسيت محتار والأفكار محتاره
ونويت اغني وباب الرزق عندالله=وبنيت قافي وقلبي حضر افكاره
ياركب اللي جديد ومركبه فله= راعيه من صالة احسن عرض مختاره
جيب لياشفت شكله قلت ماشاءالله= واللي ماهوجيب ماينعد سياره
راعيه صلى صلاة الفجر ثم تله= يوم الشفق بان قدمه هجد انواره
نحرته الشاعر اللي مختلف دله= مدري علامه علينا عمدة الحاره
وقتٍ مضى له يعقد الحبل ويحله=واليوم عوّد يعزف العود ووتاره
قدام يعطيك فنجالاً من الدله= عطه السوالف قدم البن وبهاره
لاجيت عند ابو شافي يابدر قله= ماكل رامي يصيب ويطرح الشاره
كل القوافل مشت ماعندها خله= والعلم معروف ميراده ومصداره
وحدة توخرت عنها وقلت لاوالله= والثانيه قدمها بكرت بالغاره
يوم اتصلنا نبي خوتك عز الله = تقول عاني شمال العيص وحراره
وخلاف هذا تطلعنا من المله= والناس ماهم على الغلطات صباره
أما اعترف بالخطا ندمح لك الزله= وألا تحمل لجور الوقت وأضراره
وختامها دق هاجوسي ياعبدالله= وألا ابو شافي على عزه ومقداره