من ألمانيا حيث يتلقى العلاج من عارض صحي ألم به.. وقد تماثل للشفاء ولله الحمد.
بعث الفريق متقاعد الشاعر على المشعوف هذه المشاعر التي تفيض وفاء.. وثناء على مواقف سمو الأمير سلمان بن عبد العزيز أمير الرياض الذي يعجز الشعر والنثر عن حصر مواقف سموه كإنسان.. وكمسؤول تشهد الانجازات العظيمة في الرياض العاصمة والمنطقة لما يبذله من جهد ووقت لتصل إلى ما وصلت إليه من تقدم ورقي فمع مشاعر المشعوف وما حملته من ثناء هو بعض ما يستحقه أمير الرياض وحبيبها:

يا امير يا اللي فيك نجد تباها=يا عز نجد وعز منهو سكنها
سلمان يا نور العيون وضياها=يا من سكن بقلوبنا وأنت منها
نجد من أسبابك تحقق مناها=جددت فعل أبوك يومه حضنها
يا امير جيت لها وهو قبل جاها=وتوافقن أفعالكم في زمنها
أنت الذي عليت شامخ بناها=وهو الذي قبلك مطفي فتنها
أنت الذي بيدينك أنبت ثراها=وهو الذي عن المخاطر ضمنها
وهو الذي خيله تقادح حذاها=وسط الجزيرة لين ذابت محنها
خاض المعارك والأفاعي وطاها=وهام الشدايد والمصاعب طحنها
لين احتضنها بالوفاء واحتواها=وطهر بدنها والمرض زال عنها
بالسيف والشرع المطهر حماها=وكل الأمور الجاهلية دفنها
وجاب الملوك اللي يضوي سناها=تشرق على كل الديار ووطنها
حرار من فوق الثريا مداها=المملكة علوا واشادوا مدنها
الدين مبداها وهو منتهاها=ومن صكته سود الليالي زبنها
يا دار يا دار سقتني بماها=عسى الدهر والوقت ما يمتحنها
دار كستني من براير عطاها=قلبي بها مأسور لو رحت عنها
يا سيدي لعل نفسي فداها=نموت حنا والعدو ما امتهنها
يا بو فهد يمناك ما الحق جزاها=يمنا عساها ما تفارق بدنها
يمنا تجازي بالوفاء من وفاها=تآمر على روس المعالي وتنها
يا ما غمرني خيرها مع نداها=كم اسعدت روحي وجلّت حزنها
يا امير نفسي عند ربي دواها=هو الذي يشفي ويبري وهنها
مؤمن ونفسي ربي اللي هداها=وكثر المصايب والمرض ما شحنها
العبد نفسه لو يطول مداها=لابد من يوم يفرق ظعنها
وأنا أحمد الله يوم روحي وقاها=سلمت ومن سو الليالي أمنها
يا امير جعل الله يحقق رجاها=وتبقى لنا والنفس لك نرتهنها
نفسي مشاعرها تفوح بشذاها=بالشكر مع طيب الثناء لك وزنها
بابيات شعر فوق نجد صداها=شعر ومشاعر مع سلامه قرنها
تملا ثرا نجد وتملا سماها=ما قلتها من شان ادور ثمنها