ماكل من يطرد ورا الصيد جابه=ولاكل من ركب البحر صار بحار
ولاكل من يرمى هدف دوم صابه =ولاكل من طرشت يرجع بالاخبار
ماكل من يضحك بدنياه مسرور=لو ضحكته دايم تحرك حجاجه
وماكل من يبكى من الناس مقهور=بعض الدموع رخاص من شان حاجه
وماكل صادق لو حكا لك من شعور=ياكثر من زيف المشاعر خراجه
وماكل مايخفا من السر مستور=بعض الوجيه ابين من رهاف زجاجه
وماكل بيت بابه انصك مهجور=كم بيت اطفا الشح واهج سراجه
وماكل ورد تزرعه ينثر عطووور=لو ماه صافى مايخالط هماجه
وماكل مرهف قلب لو يزرع زهور=قلب يحب الورد وهو مثل صاجه
وماكل من يخطى من الناس معذور=البعض يخطى من علوم العواجه
وماكل من يسكت عن الظيم مجبور=لجل الغلا ساكت ويداعى انفراجه
وماكل راس ضيع الفكر مسحور=كم راس سحر الحب جاب ارتجاجه
وما كل عله فادها طب دكتورر=كم عليل وصل خله علاجه
وماكل من شاور حكيم خذ الشور=بعض البشر مايقنع الا مزاجه
وماكل من سمى صقر يشبه صقور=كم من صقر وقت الشدائد دجاجه

هاذي منازل من مضالي معـه دور=مريتهـا وابطيـت أوقّـف حذاهـا
منازلٍ من شوفها القلـب مخطـور=ياليت مـن زار اللحـد ماوطاهـا
وقفت فيهـا والقـدم تقـل مسمـور=وعينٍ رجتهـم خيـب الله رجاهـا
من عقب ماداجو بها اللي كما الحور=اليـوم ماباقـيٍ بهـا الا حصاهـا
قعدت هاك اليـوم مانيـب مجبـور=ليزلـت العبـره للأخـرى وراهـا
وروحت منها العصر مانيب مسرور=وخذتلي الدنيـا مقاظـب عصاهـا
وانا اشهد ان العبد منهي ومامـور=تجي لـه الأسبـاب لـو مانصاهـا
ياونتي ونـة خلـوجٍ مـن الخـور=علـى ودهـا بيـح الله عـزاهـا
من غيبة الصفره الى شقـة الـزور=بارضٍ خلا فيهـا السبـاع تحداهـا
ومن الظما راحت كما راس باكـور=بسبـاب مفـرودٍ بحزنـه حنـاهـا
وراحت تبي الما للقليب ام ناعـور=وداجت عليها واقرشت فـي جباهـا
أو ونة اللي فاخت البـدو مجـدور=واقفو وعينـه فيضـت كـل ماهـا
تغثه العبـره علـى مشـة الـزور=ونفسه على مافـات لحقـت مداهـا
جرحٍ يطيب وجرح يحتـاج دكتـور=وبعض الجروح اسباب اهلها دواها
كني مع الامـوات حـيٍ ومقبـور=واسباب ماجا العين كثـرت بكاهـا

عزالله انه صادق