صحيح ماتت والغلا حي ما مات =يبقى غلاهـا دام هالنفـس حيـه
يبقى لها ذكرى ويبقى لها آهـاتت =دمي فوادي والجـروح الخفيـه
وش عاد لو جريت بالصدر ونات =طول الدهر ماعاد ترجـع عليـه
رمز الوفا والطيب والخلق والذات =لطيفـة المعشـر ونفـس زكيـه
جيرانهـا مايشتكـون الملامـات =وروادهـا يلقـون طيبـه ونيـه
قبال واستقبال ضحك وكرامـات =وسوالف فيهـا الظرافـه بريـه
حديثها يبري الكبـود العليـلات =ومنطوقها مثل العسـل بالخليـه
وريحه جسدها كالورود الشذيات =متجمعـه فيـه الـورود الشذيـه
هي جنة الدنيا وهي جمع جنـات =وهي نعمة من نعمـة الله عليـه
ياليتهـا تمهلـت لـو ساعـات =وتكتب بأصابعها الشريفه وصيـه
وتقرا علي آيات وآيات وآيـات =مادام قلبي بيـن روحـه وجيـه
ويلي عليها ويل ويلات ويـلات =ليت البشر تعرف مزايا الغضيـه
حتى يعذرون العيـون الشقيـات =وألا يعـذرون القلـوب الشقيـه
ودعتها بدموع وشجون واسكـاتب =عد ماأصابتهـا السهـوم القويـه
ابكي عليها بالدمـوع الغزيـرات =وابكي عليها كل صبـح وعشيـه
ابكي جمال وخلق وابكي مروات =وابكي عفاف ودين وأيدي سخيه
وابكي مزايا مجد وابكي ثقافـات =وابكي جمال الـروح والمعنويـه
هي وحدها مليون واولوف وميات =صفوه من الصفوه كريمه رضيه
وجه صبوح مبتسم كل الاوقـات =ومنهل ثقافـه كالعيـون الرويـه
انشهد إني عقبها الليـل ماابـات =راحت وخلتني ورجلـي حفيـه
مغير أفكر بالزمـن والمسافـات =وقلع النيـا والغربـه المهمهيـه
ويالله عفوك ياجزيـل العطيـات= تعفو وتغفـر ياجزيـل العطيـه
وتجعل لها بيت رفيع المقامـات =في جنة الفردوس منكـم هديـه
انت الكريـم الله راع الكرامـات =غفرانك الله من جميـع الخطيـه
ويالله تمن روعها بين الامـوات =وتلطف بها في غربـة برزخيـه
ادعوا لها يأهل الوفا والمـروات =وصلوا على طه شفيـع البريـه