منتديات الموازين الرسميه - الربيان مع الرز وشبنت

منتديات الموازين الرسميه (http://www.almouazeen.com/index.php)

- - الربيان مع الرز وشبنت (http://www.almouazeen.com/showthread.php?t=10845)

الربيان مع الرز وشبنت

عيش وشبنت على ربيان / بالخطوات المصورة

--------------------------------------------------------------------------------

المقادير:

كيلو ربيان مقشر ومنظف ومفيوح >> طرقتي بحطها تحت
عيش >>> وبلغة اخرى رز
بصلة مقطعة
ثوم
شدة شبنت
بهارات مشكلة - ثوم بودرة -زنجبيل بودرة - كاري

طريقة الربيان:

انظف الربيان عدل من الخط الاسود الي بالظهر وأنقعة ب ..
(ليمون - طحين -كركم - شوية خل - ملح)

اغسله واحطه في ماي مغلي واحط عليه كركم وكاري وبهارات مشكلة 5 دقايق واشخلة واغسله >>> متعقده من الزفر

اييب جدر ثاني واحط الربيان واحط ماي بس يغطية واحط عليه
(بصل صغار - ثوم مدقوق - كاري - بهارات مشكلة - زنجبيل بودرة - ملح)
من يطبخ الماي اقصر النار لما ينشف الماي

الطريقة:

* تحمسين البصل والثوم وتحمسين معاه الربيان
وتحطين شوي من البهارات الموجوده فوق

* تحطين عليه الشبنت وتحمسينة شوي

* تصبين علية الماي وتحطين الملح حسب الرغبة وتحطين العيش
وتخلين النار عالية بعدين تقصرين النار لما ينشف الماي

رد: الربيان مع الرز وشبنت

يعطيك العافيه اختي
بس الشبنت هو الشبت صح ؟

رد: الربيان مع الرز وشبنت

ربيان ^_^

عاد هذي اكلتي المفضله

وخاصه الربيان المشوي ^_^

لاهنتي اختي

رد: الربيان مع الرز وشبنت

اقتباس:

المشاركة الأصلية كتبت بواسطة بنيدر الميزاني (المشاركة 76388)

ربيان ^_^

عاد هذي اكلتي المفضله

وخاصه الربيان المشوي ^_^

لاهنتي اختي

نفس أبو عبدالله....Grill Shrimpهو أفضل شئ في طريقة الربيان مع أن الطريقة أعلاه هي الطريقة المعتاده..

ولكن الزفر في الربيان والسمك بشكل عام هو مشكلة من يطبخه وإلا هو أفضل الأكلات ..

نصيحه: لا ينصح بالإكثار من الربيان وخاصة من يعانون من أرتفاع في كلسترول الدم

مشكوره اختي بنت الأصيل ونفس أستفسار ريم مطير وياليت صورة بعد

رد: الربيان مع الرز وشبنت

مساكين حنى ياهل المنطقه الوسطى مايجينى الا المثلج

رد: الربيان مع الرز وشبنت

اقتباس:

مساكين حنى ياهل المنطقه الوسطى مايجينى الا المثلج

بن مشدد الله يرج سموك هههههه

انا بالشرقيه فقط

بس اذا رحت للديره قلبتها يااعلى الضبان او البقل المشوي <<< اوما بقل مشوي هههههههه

عاد تخيلوو فيه بقل مشوي

البقل هو بقلاوة البدو ياحبيله ^_^

الله يسعدك جعلتني ابتسم

رد: الربيان مع الرز وشبنت

اقتباس:

المشاركة الأصلية كتبت بواسطة ريم مطير (المشاركة 75907)

يعطيك العافيه اختي
بس الشبنت هو الشبت صح ؟

اختي ريم ماني عارفة شنو (الشبت)
بس احنا نقول الشبنت نفس البقدونس
ومشكورة اختي

رد: الربيان مع الرز وشبنت

اقتباس:

المشاركة الأصلية كتبت بواسطة أبن مصاول (المشاركة 76437)

اخوي أبن مصاول يسعدني مرورك
لكن ياخوي منزلة صور عن الطبخة انصدمت مو طالعة وياي احاول انزل ترد ما تطلع وياي مرة ثانية
هم احط صورة رمزية من عندي ولا تنزل ليش ؟!!

رد: الربيان مع الرز وشبنت

ابن مشدد يسعدني مرورك
بندر الميزاني مطيري وتاكل الضب ماني مصدقة!
شرايك تبدلة بالقباقب
مشكور اخوي

رد: الربيان مع الرز وشبنت

اختي بنت الاصيل هذا الشبت عندنا

http://www.almizany.info//uploads/im...58666deef8.jpg

هو الشبنت عندكم؟؟