وجدي على اللي شوفهم يشرح البال = كرام النفوس أهل العقول الثقيله
كرام النفوس اللي يربون الأجيال = على المكارم والقيم والنفيله
نطاحة الواجب شريفين الأفعال = افعالهم من كل جانب جميله
اللي لهم في نجد شهره ومدهال = الأسم فاخر والفعائل جزيله
صار العوض فيهم لنا بعض الأشكال = جيلٍ طلع تالي..جديدٍ مديله
جيلٍ اليا شاهد له الميل ميال = ومن وين ماجات العواصف تشيله
من طلعته ماهو للثقال شيال = ولا ينطح الكايد ولا يرتكيله
دايم سواليفه بيجر وجوال = وسوالف الماضين ما تستويله
جنب طريق الأبو والجد والخال = وضيع سراه الله يضيع دليله
ليا شاف لعاب الورق جاه بالحال = ولعب معه والتتن مالٍ يشيله
وان فازوا أهل المنتخب صابه أهبال = وطاح وزميله قال واعزتيله
كنه صويب الحرب مع ربعن أبطال = تطلب له الأسعاف حتى تشيله
ساعة وقع قالوا ترى طاح رجال = ما يعلمون أنه دبشتن هزيله
هزيل عقل ومخ وأفكار وأفعال = واللي مثل هذا حياته فشيله
يا وقت يا وقت العجايب والأهوال = ياللي وصلنا بك طبايع دخيله
طبايعٍ ما جابها العم والخال = جتنا من أصحاب الطباع الرذيله
حنا طبايعنا الكرم والتهلال = اليا نصونا اهل السلوم الأصيله
وحنا العرب يضرب على فعلنا أمثال = بشجاعةٍ فالحرب ماهي قليله
يعيال أهالي نجد وش غير الحال = عودوا الى التاريخ وخذوا دليله
المرجله ماهي بأغاني وموال = ولا شريط افلام ورد بحيله
شوموا عن أصحاب الحيل والتحيال = وأبنوا لدرب العز صفحه جميله
والحر ما يصلح مع البوم نزال = يشهر ويلقاله أحرارٍ تجي له
عيب وحرام وعشرة النذل غربال = واللي محرم...مايجوز تحليله
يابن الحموله ليش تنزل من العال = وتتبع دجاجٍ منعثر في مقيله
لاتنزل أنهض! فوق عن كل دجال = مالك ومال أهل العقول العليله
وصلوا على المختار والصحب والآل = عداد من شاف القمر من قبيله