يا فالق الصبح يا مولـج نهـارك بليـل = يا جامع الناس في يوم البعـث والنشـور
عليك كل إتكالـي وأنـت نعـم الوكيـل = يا عالم بالمصيـر ومـا تكـن الصـدور
يا الله يـا الله تهدينـي سـواء السبيـل = وتعصم لساني عن الزلة وعن كـل زور
الشعر موقف وحده مثل حـد الصقيـل = لو كان كتلة من احساس البشر والشعـور
يا ما رقا بي ورقيتـه بـراس الطويـل = وياما سبح بي بحور وغصت به في بحور
وانا ليا حـان ميقاتـي قبسـت الفتيـل = واوقدت من نار فكري للمسافـات نـور
واليوم لاهنت ياشعري ما يخـدم بخيـل = ما دام سلحتك الافكار مـا أنـت معـذور
قدمك من العز ما يروي ظما كل جيـل = سوالفه تزرع الامجـاد فـي كـل بـور
وقدمك لميع الهنادي والقنـا والصقيـل = وقدمك من المجد ما ترويه كل العصـور
مسافة العز مـا تنقـاس كيلـو وميـل = بركانها ما خمـد وامجادهـا مـا تبـور
يا موكب الشعر وقف واستمع لي قليـل = حتى أني اعطيك للتاريخ رخصـة عبـور
سيرة بطل مـا تغيبهـا حكايـة رحيـل = تبقى بوجه الزمن كالنحت فوق الصخـور
ما كانت أرض الجزيرة قبل ذاك الاصيل = إلا تفكـك عقيـدة وانـحـدار ودبــور
نهارهـا كـم قتيـل وليلهـا كـم قتيـل = جنايـز مالهـا فـوق البسيطـة قـبـور
قويهم سلطتـه تسلـب حقـوق الذليـل = وشيطانهم ساد والظلم انتشـر والفجـور
وكلّ لخصمه من اصناف العداوة يكيـل = وصدروهم من جهلهم بالمعاصـي تفـور
ما للأمن شجـرة فيهـا مقـر ومقيـل = ولا بينهم للمودة فـي الجزيـرة جسـور
هذا قبل هيت تخطيهـا عيـون الدليـل = وهذا قبل سطوة القرم العـزوم الصبـور
النادر اللي على العارض يهيـم ويخيـل = من يوم عمره عشر شوره غلب كل شور
من قو باسه صنع ممكن من المستحيـل = ومن طيب راسه يحل معقـدات الامـور
زهابه الصدق والاخلاص حمل الصميل = وسلاحه الدين والتقـوى سـلاح الغيـور
جمع شتات القبايل لين صـاروا فصيـل = واخوان عقب التناحر والجفـا والشـرور
وحكم بشرع الكتاب اللي ما غيره بديـل = وعم الفرح فالبلاد وسـاد كـل السـرور
لا مال ميزان غيره مـا يحيـد ويميـل = في حضرته ينكسر راس الجهل والغرور
شخصيته ما لها في كـل جيلـه مثيـل = تجف الاقلام وبمدحـه تضيـق السطـور
والله ليبطن ماجابـن ناقضـات الجديـل = مثله ولا اقول في كل النشامـى قصـور
ويا الله يامستجيـب للدعـاء يـا جليـل = من عبدك اللي لك مطيع وذليل وشكـور
ترسل على قبر ابو تركي صدوق المخيل = وسم يساقيه من غـر السحـاب البكـور
وتهل فوقـه بسيـل مـا يلاديـه سيـل = وترحم عظامه وتغفر زلتـه يـا غفـور
وتجمع به المصطفى في جنتك والخليـل = وتحفظ عياله مواكير الحـرار الصقـور
وانك تجمـل وتهدينـي سـواء السبيـل = وتعصم لساني عن الزلة وعن كـل زور

الله يعافيك اخوي ابوسعران المريخي.. شكراً لك على مرورك .. سلطان الميزاني.

الله يعافيك .. أختي دلوعة المهـد .. وشكراً لك على مرورك .. سلطان الميزاني.