منتديات الموازين الرسميه

أخواني وأخواتي في الله

السلام عليكم ورحمة الله وبركاته

إليكم هذه القصيده وأتمنى أن تعجبكم وتنال إستحسانكم

ياوجـــــودي وجـــد مــــــن لا دوالــــــه *** حالــه سقيــــم ولا لقــى من يعينــــــه

أو وجــد مغني النفـــس يـــرثي لحالـــه *** تشـــــوم عـــزة نفـــس مــدة يمينــــه

أو وجــد أبـوادبـــاسٍ بشوفــــة ضنالـــه *** العــــام ثامــــن والرسايــــــل دفينـــه

أو وجـــد مـــن ضيـــع حرامـــه حلالـــه *** تايــــب ومخنــــوق الربــا لـه رهينــه

أو وجــد من يفقـــد عـــزيـــزٍ صفالــــــه *** بعـــد الصفــا صـــافي علـى دمع عينه

أو وجـــد من يمســـي بعــــــزه ومالـــــه *** ويصبـــح على ماشـي تصفـــــر يدينه

أو وجـــد مظلــــومٍ وظلمـــــه عدالــــــــه *** يبغــــي العدالــــه والعدالــــه سجينـه

أو وجــــد من لاقــى الجفـا مــن عيالـــــه *** يبغـــي معزتهـــم وشابــــت جبينــــه

أو وجــــد شيـــخ الديــن وقـــذفٍ ينالــــه *** وقـــار علمـــه ماشفـــــع مبغضينــــه

أو وجـــــد من قالـــوا عمامـــــه خوالــــه *** والثــار دايـــر والوصـــــل معدمينـــه

أو وجــــد وجـــــدي لا توجـــــد لحالــــــه *** قلبــــي تفطـــــر ثــم بيــــح كنينـــــه

هـــمٍ شغـــل فكـــري ولانـــــي بدالــــــــه *** عكـــــر منامــــي قمت أجــر الهجينـه

ياعلــــــةٍ فالقلــب والفكـــــــر عالــــــــــه *** طبــــــعٍ تطبعتـــه وطبــــعٍ ياشينــــه

يسريبــــي الهاجــــوس وقلبــــي سرالـــه *** وعيــــنٍ تعــاف النوم وعيـــنٍ حزينه

ملجــــاي للــــه بقدرتـــه جـــــل جلالــــــه *** رافـــع سبــع باســط سبــع لـه رزينه

ياللـــه ياخالــــــق بحـــــور وجبالــــــــــه *** ياخالــــق الإنسان مـــن أصــل طينـــه

ياواهــب الأرزاق خـالـــــــــق جمالـــــــــه *** ياعالـــــمٍ جهـــــر الأمــــور ودفينــــه

يامنـــــزل الأديـــان رســــــل رسالـــــــــه *** رسالــــــة التوحيــــد ســــاس وخزينه

ياسامــــــــعٍ دبــي النمـــل فـي ليالـــــــــه *** فــي صخــــرةٍ صما وعــارف كمينــــه

كــن فَيكــن أمـــــرُ مـن اللــــــه وقالـــــــه *** وبيــــن كــــاف ونــــون أمــره يبينــه

لــه الرجـــا والملتجـــا والدعـــالـــــــــــــه *** مابـــــه وسيــــــطٍ بين عبــــــده وبينه

ياناصــــر المظلــــــوم وعبـــــــدٍ نصالــــه *** تــزيــــح هـــم وغــــم زايـــــد ونينــه

أفـــــرج لعبـــدك تعلـــــم اللــــي جرالـــــه *** شايــــف وعايــف والجــوارح حزينه

يارب لا تجعــــل حياتــــــي ثمــالــــــــــــه *** بيـــن الرجـــا واليــــاس وهــذا روتينه

يارب عيشنــــــي بخيـــــــر وسهالـــــــــه *** وأغفــرلـــي اذنـوبــي وماضــي سنينـه

يارب صنفنـــــي بصفــــــــــوة رجالـــــــه *** سنـــة وســط ساســـه ومنهـــاج دينـــه

وأعــــوذ بـــك يــارب بخـــل وجهالــــــــه *** وأعــــوذ بـــك شيطــــان وســو القرينه

وأعــــوذ بــك يــارب جبـــن ورزالـــــــــه *** وأعــوذ بــك فقــــر وظلـــــم وغبينـــــه

هـــذا سبب هـوجــــاس قلبـــي حكالــــــــه *** فــي بـادي الأبيــات وجــــــدي يقينــــــه

بـس ياقلـــم كافــي وكافـــــي عبالــــــــــه *** ســـال الحبـــر والقلـــب زايـــد ونينــــه
محمد صالح الميزاني