السوق ولا ولعبوبه هواميره == في داخل السوق صارو مثل الاشباحي
خلوه جواً معجعجتاً معاصيره == ماعاد يعرف به المجنون والصاحي
يشبه لغصنن بعد طارة عصافيره == يبس الغصن والورق بعد يبس طاحي
حطوو لهم فيه تحويله وتدويره == والكل منهم طلع سارق ومزاحي
وحطوو لمن يدخله حاجز وتسكيره == ماعاد له رجعتاً من عقب مرواحي
روح مراح القطا من عقب تطييره == نفض بعد ماسمعله رمي وصياحي
صيداً على جرته تعبوو مداويره == نوى يهاجر وكب الدار وانزاحي
والسوق يصعب على اهل العرف تفسيره == ماعاد ناجد له مفسر وشراحي
تولته عالمن ماعندهم غيره == ماعندهم هم غير بجمع الارباحي
والكل منهم توطتنا حوافيره == بالسوق يسرح ويمرح ماله امناحي
اموالنا ضفها في غارب ابعيره == وحنا على جرته هلكا وطياحي
لو هيئة المال وسط السوق واتديره == وتقوم باعمالها بخلاص وانصاحي
انكان منهار سوق الفقر والحيره == واللي دخل به حفظ ماله ومرتاحي
يالله يامن عبدته ماعبد غيره == ياخالق ارواح ويضا مفني ارواحي
تعوض عبدك بعد كثرة مخاسيره == وانته يدينك كريمه ماهي اشحاحي
اتبدل الحال من عسره لتيسيره == وتبدل اهمومنا بسرور وافراحي
وصلاة ربي وتسليمه وتقديره == على بنياً دعا الامه بالاصلاحي