بعد الفقر حطت شريحه وجوال= يسعد مساء جوالها والشريحه
كانت تجيني تشتكي قلة المال= وتصيح لاج طاري الفقر صيحه
تقول ابوي دايم الدوم رحال= وامي كبيرة سن دايم طريحه
وانت الوحيد اللي له القلب ميال =دايم يصارحني وانا له صريحه
طفله وانا معشوقها بين الاطفال= جريح حب طاح له في جريحه
كنا سوى نرسم على التربه آمال=واحلام تقتلها الحياة الشحيحه
كم دمعة كانت على الخدتنهال= واذا نزلت ضاقت على الفسيحه
الله كم صرخه وهمسه وموال=كم جادت علينا القريحه
نخيل لو مافي السماء برق وخيال=وانكذب الايام لوهي صحيحه
تقول لاحطيت لك بشت وعقال= ويسر لك الرحمن عيشه مريحه
اخاف تتركني على عثرة الفال=للفقر ووجيه الحياه القبيحه
وحبيتها بين الاخلايق والازوال=حب يطول الوقت ماحد يزيحه
وسلمته قلب تباريه الاهوال =وطاح الخفوق وطيحة القلب طيحه
راحت وخلتني مع القيل والقال=شاعر صواديف الدهر تستبيحه
ودار الزمان وغير الحال بالحال= وجاها الزمان بكل ورده وشيحه
فله وخدامه ولكزس وجوال= وانا عجزت ادفع رسوم الشريحه