جاني وأنا في وسط ربعي وناسي = جاني نشلني مثل ما ينشل الناس
مني نشل روحاً تشيل المآسي = تشكي من أيام الشقا تشكي الياس
أثر الألم في سكرة الموت قاسي = ماهالني مثله وانا انسان حساس
جابوا كفن ابيض مقاسه مقاسي = ولوفوبه الجسم المحنط مع الراس
وشالوني اربع بالنعش ومتواسي = عليه ومغطى على جسمي لباس
وصلوا علي وكلهم في مآسي = ربعي ومعهم ناس من كل الاجناس
يكيف سوى عقبنا تاج راسي = وامي الحبيبه وش سوابها الياس
أسمع صدى صوتاً يهز الرواسي = قولوا لها لا تلطم الخد ياناس
أصبحت في قبري ولابه مواسي = وأسمع قريع نعالهم يوم تنداس
من يوم ما حلوّ وفكوا لباسي = وعلي رد الروح صوتاً بالاجراس
هيكل غريب وقال ليه التآسي = صوتاً رهيب وخلفه ثنين حراس
واقف يقول إن كنت يا نمر ناسي = هاذي هي أعمالك تقدم بكراس
ومن هول ماشفته وقف شعر راسي = وانهارت اعصابي ولرد الانفاس
يا ليتني فكرت قبل انغماسي = بالغفله اللي منتهاها للأفلاس
فزيت من نومي على صوت ناسي = واصرخ واقول الموت واحذر الناس