الله من حالٍ تكدر شرابها=ونفسٍ من الحرمان جاها صوابها
همٍ يوديني وهجسٍ يجيبني=وعينٍ تهل الدمع من حر ما بها
اسهر واخفي حسرتي في ضمايري=خايفه من دموعي لا يندرابها
وانا سبب ما صاب نفسي وحالي=شيٍ جرح نفسي وزاد التهابها
انثر العبرات من حر مابي=من واهسٍ وسط الحشى قد لجابها
بفراق من يملك فوادي من الملا=نفسه اشتقيت بها ونفسي اشتقابها
على الوفا حطيت يمناي بيده=روحه حلالٍ لي وروحي يهنابها
وعلمت ناسي والجماعه بقصتي=وبينت مجرى قصتي ومن مشى بها
وجاني الجواب اللي يزلزل كياني=وياليت منهو قالها ما حكى بها
قالوا اخوك من الرضاعه تريضي=هذي الحقيقه ولا يحق اجتنابها
وحسيت كن القلب زاد التياعه=ونفسي من الحرمان ضاق الفضا بها
ان قلت انا بنساه هذي مصيبه=يا كيف بنسى من حياتي اعتنى بها
مادري ألوم الوقت باللي جرالي=واحمله ما صاب نفسي وصطابها
والا ألوم النفس وأكتم مصيبتي=واعيش في دنيا قليل الرجا بها
ما بين خط الياس واشعاع الرجا=سمرت في دنيا قليل الرجا بها
يا نفس كفي واستكفي من العنا=خلي الليالي ليا تعذر حسابها
خلي قليل الحظ يشقي ويشتقي=وشلي بدنيا يوم حظي غدابها
دنيا التعاسه صارت اليوم دنيتي=دنيا السعاده سدت اليوم بابها
الهم والحرمان والضيق والشقا=ودنيا تركز في فؤادي احرابها
لا صار من حبيت اصبح اخويه=دنيا القهر والضيم وش ينبغابها
ترجمت مأساتي وحظي وبلوتي=وطويت مبدأ قصتي ومنتهابها
دفنت حبي بين طيات القهر=ثم زدت فوقه من رمايل ترابها