منتديات الموازين الرسميه - قصيدة رثاء في والدي رحمة الله عليه؟؟

منتديات الموازين الرسميه (http://www.almouazeen.com/index.php)

- الشعر العام والفصيح (http://www.almouazeen.com/forumdisplay.php?f=34)

- - قصيدة رثاء في والدي رحمة الله عليه؟؟ (http://www.almouazeen.com/showthread.php?t=19127)

قصيدة رثاء في والدي رحمة الله عليه؟؟

السلام عليكم ورحمة الله وبركاته :
يسألوني ليه ما تكتب قصيده في وفاته
ما تفجّر حزنك وسطّر على موته قصيده
قلت كنّه عايش فيني وذاتي بين ذاته
حاضر وغايب معي ماهو معي حيّ وفقيده
ما يموت اللي ليامن مات في موته حياته
حاشها دنيا ودين وعاش في الثنتين عيده
ويش ابدّي من صفاته ويش اخلّي من صفاته
والله انها تفتخر به مثل ما كانت تزيده
إن عطى يعطي الجزل ماهوب يعطي من فتاته
كنّه اللي حالفٍ مافيه فلس إلا يبيده
وإن ثبت حتى الجبل ماهوب مثله في ثباته
وان فزع ما عوّد إلا وطلبة الفزّاع ف يده
وان تحدّث قلت ليته ما يطوّل في سكاته
وان سكت قلت الكلام اللي خلص ليته يعيده
وإن ترفّع ما عطى اللي عند ماطاه التفاته
وان تواضع قلت يا صبره على النفس الزهيده
كان في دنياه لا يشمت ولا يقبل شماته
ماتشوفه كون في روس المراقيب البعيده
عابد من كان طفل الين عنّزته عصاته
حامد لو حدّته دنياه لدروب شديده
زاهد لو يملك الدنيا وهبها في زكاته
راكد يتبع كلام العقل واشواره سديده
ساجد نوره تجّلى في جبينه من صلاته
ماتركها لين وقّف نبض دمه في وريده
من صباه إلين جاه الشيب مابه فرض فاته
حاسبينه عند رب الكون من خيرة عبيده
يا الله انّك من عذاب النار تكتب له نجاته
تسكنه فردوسك الأعلى ويلقى مايريده
غاب جسمه مات لكن ما شعرنا في مماته
الفعل والقول له والذكر له والجيد جيده
وان سألتوا ليه ما تكتب قصيده في وفاته
قلت حزني في وفاته ما توفّيه القصيده