تطمني يادارنا والعود في عين الحسود = حنا لياجات اللوازم كلبونا حاضرين

رهن الاشاره كلنا والراي راي ابن سعود= ليا زهمنا سيدي حنا لرايه سامعين

ماهمنا فعل الروافض لوتكثر بالحشود = ولاهمنا فعل الزيود الي علينا خارجين

حنا عن حدود الوطن بارواحنا حنا نذود= واكبر دليل ابطالنا على الحدود مرابطين

وحنا لبسنا بدلة التجنيد واصبحنا جنود = ارواحنا دون الوطن تفداه والقاسي يلين

لاياجبل دخان ياجيزان قم وارقا سنود = الشعب والحكام في وقت اللزوم مجاهدين

وياشلة الحوثي وياشلة نجاد ويازيود= حنا سعوديين لاقمنا لنا فعلٍ يبين

لامنها شبت شبوب وحك عودٍ راس عود= حنا لرايات الشجاعه والشهاده رافعين

نحمي حدود الدار والخاين هنا ماله وجود= والي يحاول زعزعه يحسب حساب الخايبين

مابيننا خاين وطن وابطال مافينا شرود= بإرادة الله وامر قايدنا نهزم المعتدين

والرايه الخضراء ترفرف فوق في راس العمود= ومحمد الهادي رسول الله شعار المسلمين

والي جحد فضل السعوديه هذا والله جحود = وحنا مانحتاج الشهاده من نفوس الجاحدين

وليا فعلنا شئ طيّـب ماندور للشهود = والناس تعرف مملكتنا من قديمات السنين

حنا ليازادو هل التوحيد والتقوى نزود= وحنا لفعل الخير في كل الديار مناشدين

الا ليا صارت صواوين الفتن حول الزنود= من دون دولتنا وقادتنا نكون محاربين

والي يخطط للمشاكل والله انه مايسود = حتى ولو جمّــع عصابات لبلدهم خاينين

مايدري ان المملكه ورجالها مثل الاسود؟= في ظل عبد الله وسلطان السعد متكاتفين

وسلام ياخالد ولد سلطان يانسل السعود = يالي لبست البدله وصفيت جنب الاولين

فعلك بطولي وانت لك فعلٍ قديم وله شهود= انت الذي قدت المعارك والنشاما خابرين

وهذا شعار المملكه والطيب ماهو بمحَـدود = كل النشاما للصفوف الاوله متولمين

واخر كلامي يارجال الجيش يا أمن الحدود= انتم حماة الدار وانتم درعه الحصن الحصين

ويعيش عبد الله طويل العمر حلال العقود = وليا ومرنا سيدي حنا لرايه سامعين

رائعة من روائع ابن غلاب

وفي مثل هذه الأوقات تتفتح قريحة الشعراء بالشعر الحماسي الجميل

بيض الله وجهك يابو عيسى ومنصورين إن شاء الله