بسم الله الرحمن الرحيم

الراتب نزل
غلا الاسعار

قالو لي(الراتب نزل)قلت وش عاد=ينفد خلال اربع وعشرين ساعه
فوق السماء رازق وفالارض حساد= وللسعر طب وللاوادم اشاعة
تبغون معنى راتب الشخص لازاد= معناه باب(ن) فك لاهل الطماعه
اهل الطمع تسرق على روس الاشهاد=وكلن يقّّّيم سلعته من ذراعه
الكون واسع حسب تقرير الارصاد=هذا خبر بثوه عبرالاذاعه
قلت اللهم تجعل الوسع يزداد= لو؟ان مالي حاجة(ن) فاتساعه
يضيق فينا الكون لاجات الاعياد=ويضيق لاشفنا وجيه الجماعه
شحت مواجيب الكرم عند الاجواد=يوم الغلا ميّل عليهم قناعه
ان طق باب البيت زاير ونشّاد=مايفتحه وليا فتح له؟؟؟؟ براعه
حل الايجار وجاك راعيه سرداد=يبغاه لاحلت عليه الشفاعه
اعطيه والا اعطي هوامير الاقصاد=والكهرب الملعون خطر انقطاعه
لاجيت ابرقد بين تفكير وجهاد=اسمع صياح الورع قاض(ن)رضاعه
الفقر متعوذ منه سيد الاسياد=نبينا رمز الكرم والشجاعه
تكفا يا(بومتعب)ترا حيلنا باد=حنا بدجا ليل(ن)كلتنا سباعه
تجارنا للحسد والكذب رواد=لو ودهم؟ كان اقلبوها مجاعه
حقوقنا توخذ على غش وعناد=ونقول للطماع سمع(ن)وطاعه
شكيت للغش التجاري ولافاد=ولانفع حتى وزير الصناعه
نبغى امر مرسوم في لهجته حاد=يهدف الى تحديد سعر البضاعه
تكتب عليها السعر من قبل الامداد= اسعارها تطبع عليها طباعه
نبغى انتهنا بعيشنا قبل الالحاد=وراع الطمع يغنيه كنز القناعه
ومثلك (يابومتعب) زعيم امة الضاد=عالي وشعبه يفتخر بارتفاعه
انتم حميتو اجدادنا وقت الاجداد=واليوم حنا في ذراكم وداعه

شكرا وعرفان للادارة منتدى الموازين
اتقدم انا الشاعر:عبدالرحمن متروك صالح العقيلي المطيري بعظيم شكري
وامتناني الى ادارة واعضاء منتدى قبيلة الموازين على حسن الضيافة وحفاوة
الاستقبال الذي قوبلت به منذو طرقت ابواب هذا الصرح الاعلامي الكبير والذي
امتدت الى تقليدي وسام التميز وهو شرف عظيم لي بان اكون من الشعراء المييزين
في هذا المنبر الاعلامي الذي يعد من المنابر الاعلاميه الكبيره ساءل الله سبحانه وتعالى ان يوفق ادارته
وطاقم العمل الى مافيه الخير وصلاح الامه وان يوفقني الى تقديم المشاركات الذي تليق بسمو هذا
الصرح وارضاء رغبات محبيه واعد الجميع انني سابذل كل مافي وسعي لتقديم مايحوز على رضاكم واستحسانكم
وتقبلوا تحياتي