يا فالق الصبح يا مولج نهارك بليل=يا جامع الناس في يوم البعث والنشور
عليك كل إتكالي وأنت نعم الوكيل=يا عالم بالمصير وما تكن الصدور
يا الله يا الله تهديني سواء السبيل=وتعصم لساني عن الزلة وعن كل زور
الشعر موقف وحده مثل حد الصقيل=لو كان كتلة من احساس البشر والشعور
يا ما رقا بي ورقيته براس الطويل=وياما سبح بي بحور وغصت به في بحور
وانا ليا حان ميقاتي قبست الفتيل=واوقدت من نار فكري للمسافات نور
واليوم لاهنت ياشعري ما يخدم بخيل=ما دام سلحتك الافكار ما أنت معذور
قدمك من العز ما يروي ظما كل جيل=سوالفه تزرع الامجاد في كل بور
وقدمك لميع الهنادي والقنا والصقيل=وقدمك من المجد ما ترويه كل العصور
مسافة العز ما تنقاس كيلو وميل=بركانها ما خمد وامجادها ما تبور
يا موكب الشعر وقف واستمع لي قليل=حتى أني اعطيك للتاريخ رخصة عبور
سيرة بطل ما تغيبها حكاية رحيل=تبقى بوجه الزمن كالنحت فوق الصخور
ما كانت أرض الجزيرة قبل ذاك الاصيل=إلا تفكك عقيدة وانحدار ودبور
نهارها كم قتيل وليلها كم قتيل=جنايز مالها فوق البسيطة قبور
قويهم سلطته تسلب حقوق الذليل=وشيطانهم ساد والظلم انتشر والفجور
وكلّ لخصمه من اصناف العداوة يكيل=وصدروهم من جهلهم بالمعاصي تفور
ما للأمن شجرة فيها مقر ومقيل=ولا بينهم للمودة في الجزيرة جسور
هذا قبل هيت تخطيها عيون الدليل=وهذا قبل سطوة القرم العزوم الصبور
النادر اللي على العارض يهيم ويخيل=من يوم عمره عشر شوره غلب كل شور
من قو باسه صنع ممكن من المستحيل=ومن طيب راسه يحل معقدات الامور
زهابه الصدق والاخلاص حمل الصميل=وسلاحه الدين والتقوى سلاح الغيور
جمع شتات القبايل لين صاروا فصيل=واخوان عقب التناحر والجفا والشرور
وحكم بشرع الكتاب اللي ما غيره بديل=وعم الفرح فالبلاد وساد كل السرور
لا مال ميزان غيره ما يحيد ويميل=في حضرته ينكسر راس الجهل والغرور
شخصيته ما لها في كل جيله مثيل=تجف الاقلام وبمدحه تضيق السطور
والله ليبطن ماجابن ناقضات الجديل=مثله ولا اقول في كل النشامى قصور
ويا الله يامستجيب للدعاء يا جليل=من عبدك اللي لك مطيع وذليل وشكور
ترسل على قبر ابو تركي صدوق المخيل=وسم يساقيه من غر السحاب البكور
وتهل فوقه بسيل ما يلاديه سيل=وترحم عظامه وتغفر زلته يا غفور
وتجمع به المصطفى في جنتك والخليل=وتحفظ عياله مواكير الحرار الصقور
وانك تجمل وتهديني سواء السبيل =وتعصم لساني عن الزلة وعن كل زور

فاح عطر القصيد وغردن الفرايد=من ضمير على بدع المثايل رهاوي
واشلعن من غصون الشعر ندر القصايد=شردن مايروظهن قريب الهقاوي
واستوت طبخت المعنى بجمر الوقايد=لين ذيب القصيد من الوله جاك عاوي
حالفن اني لاعلقها قلايد قلايد=لين ماعاد تطلع من ذهن كل راوي
وكان مارضيت راع الموهبه والمحايد=والله اني لاصير عن القصايد نحاوي
اعشق الشعر واخذ من سنيني فوايد=واتزود وانا اللي ماقطعت الرجاوي

جعل يوما جمعنا في الامارات عايد=دولتن ماحكمها غير حر النداوي
لين صار الامن والعز والخير سايد=ومن يجيها فقير يروح منها غناوي
اعشق ترابها واحبها حب زايد=ودي اروح عنها مير ماني بقاوي
املكتني وانا قلبي من الحب جايد=وحبها مايداويه الطبيب المداوي
ودعت قايدن غالي وفرحت بقايد=عنده اكبر مصيبه مثل شرب القهاوي
وله عضيد عليها للامجاد رايد=من هو اللي براعي المجد والطيب غاوي
سعد منهو تعزوى به نهار الشدايد=يوم فعل الشجاعي يبين وقت العزاوي
وانا من دولتن فيها وساع البنايد=دوله ال سعود مزبنين الجلاوي

يا عذابي منك يا موتي ويا حرماني=زابنك باالله تخفف عني اللي فيه
من عذابك وشهو اللي باقي ما جاني=في عيوني من عذابك صايرن ماريه
وانت تدري كل ما تحتاجني تلقاني=يشهد الله عنك ما تقدر تشح ايديه
بس تكفى لا تعذبني ولا تنساني=ضمني يا نور عيني في حشاك شويه
كل ما شفتك تدخلني بعالم ثاني=عين تنظر لك بشر والثانيه حوريه
فيك شيطان الهوى يا منيتي وصاني=بالغلا والولف والتقدير والحنيه
والقصيد إليا بغيته فيك ما يعصاني=يتباشر في وصوف عيونك السحريه
وا وجودي في شوفك يا بعد خلاني=والله اني لحذف الغتره على الطاقيه
كيف انا المجني عليه وكيف صرت الجاني=نعنبو حظك ظبت الخلطه السريه
لين من طيشك ومن حبك نسيت اخواني=صرت اجي واروح لا هذي ولا هذيه
والهوى هو حاكم شعوري وهو سلطاني=ولا حصل لي منه لا رحمه ولا ماويه
اشهد انه راح فيها تركي الميزاني=والله اعلم وش تكون الخلطه السريه

يا بنت انا قلبي من البعد محروق=لا تحسبين اني قطعت العلاقه
محبتك في القلب وابراجها فوق=تشيل صوت اسمك وحلم الصداقه
محبتن ما شالها كل مخلوق=بطاقة يا حيها من بطاقة
يسوقني طاريك لمشاهدك سوق=واشفق على لمست ايدينك شفاقه
والصبر زين وكل مطرود ملحوق=شرهة قدم رجل على عظم ساقه
زرعت لك زرع له اثمار وعروق=وقدمت لك من زهرة العمر باقه
وإن كان عندك شك لا ناشك العوق=في قلبي اللي يزيد اشتياقه
الشوق مشتاق لك اكثر من الشوق=شوق بدوي ضاعت اغلى نياقه

ماني مجازيك في صدك وهجرانك = وداعتك الله وتلقـى واحـدٍ ثانـي
أتعبت الأعيان والأقدام من شانك= وانته ولاشئ سويته علـى شانـي
فزيت لك يوم قلت اسمك وعنوانك=لوكان ماتنتمي لسمـي وعنوانـي
ماجيت ادورك و لا أطق بيبانك = والا أترجـاك مثـل أفـلان وافلانـي
أنت الذي جيت لي وأعلنت بلسانك = انك على شوفتي جايع وعطشاني
صدقت هرجك ومنطوقك من السانك = وأقبلت لك مندفع من كل وجداني
ما كنت أفكر يجي في يوم نسيانك = وأنساك وانته معاهدني ماتنسانـي
الابعد ما قريت الكذب فاعيانك=حاولت اوادعك وانسـى كـل ماكانـي
خلاص ماني بمتعنـي علشانـك=ودعتـك الله وتلقـى واحـد ثانـي

البارحـه يـوم كـلٍ نـام يانايـف=أخـوك ماهـوب لانايـم ولاواعـي
يحوف قلبه من همومه ميـة حايـف=من غير همٍ قديـمٍ بيـن الأضلاعـي
همٍ يزعزع جبال طويـق والطايـف=مخفيه لي مدةٍ مـع باقـي أوجاعـي
لاشك ماني من غدر الزمـن خايـف=أعرف دخولي بعد ماأعرف مطلاعي
لكن الأيام منهـا خاطـري عايـف=لو إنهـا تجربـة عمـر وتمتاعـي
يلوفني عن مقاصد خاطـري لايـف=وأمشي مع الدرب وعيوني لمرجاعي
لاعاد تنشد عيوني ويش أنـا شايـف=مافي عيوني يسولف لك عن أوضاعي

على الله يامداين خاطري يا عاصمة دنياي=على الله يالحروف التايهه في نظرة التايه
على الله يالطريق اللي معاريفك تعب رجلاي= على الله يا مسافر في طريق ماله نهايه
الاياليل لاتسري ولاتشره على مسراي=دخيلك لاتقدم شرهتك من دون مسرايه
على شان الحبيب اللي يسابق نظرتي وخطاي=على نفس الطريق اللي من اجله تعبت اخطايه
ترجيتك تساعدني وانا ماندم على رجواي=إذا شفتك توادع ضيقتي وتعانق ارضايه
وانا اخترتك رفيق الدرب في صمت السنين الجاي=ولا اخترتك يالين اصبحتلي ياعز خويايه
وانا ماعشت وقتي يازماني بين راي وراي=انا عشته على عز ورضيت بحكم مولايه
ولا اطرد من سراب الوقت مايجلب علي مناي=اعيش الواقع الحاضر لعين ايامي الجايه

ياسعود لاتنشد عن الحـال ياسعـود=الحـال ولـى فالزمـان المـولـي
والجسم الاقشر قام ينحل كما العـود=والهم خاوينـي معـي ثـل ظلـي
لو قلت لك موجـود مانـي بماجـود=اظحك واجامل واحدن مافطـن لي
متبعدن عن كـل شـاذب ونمـرود= ومنزحـن بيـن الخلايـق محـلـي
ياسعود يوم الهرج لـه قـن وحـدود= وداني اكتبلـك عـن الـي حصلـي
والي حصلـي لـه مصاديـر وورود=اقفـت صـدوره والـورود اقبلنـي
من عقب ماسافر على زورق النـود= عود وجا من سفرتـه راجعـن لـي
واول جوابه لـي مقابيـس وزنـود=ونارن تشل اطراف الاظـلاع شلـي
وان قلت مالك من ورى القلب مقصود=وان كان لك مقصـود عبـر وقلـي
تال الزمان يبيـن البيـض والسـود=لاتحسبنـي راجعـن لـك تسـلـي
وان قلت وش رجعك لافدت بالفـود=قال انشد الـي جابنـي مـن محلـي
ماجابه الا مـن يقـود الهـوا قـود=قـود البعيـر اليـا امتنـع لايفلـي
الصاحب الي دونـه الحـزم ممـدود=بقصى جبالـن حيدهـا عارضنلـي
ارسل مراسيله يبـى العلـم موكـود=ياليت مرسولـه جلـس ماوصلي
عقب السنيـن مشيبـة كـل مولـود= اليـوم مـن فرقـاه دمعـي يهلـي
ياسعود قلبـي راح ماعنـه منشـود=كب الظلـوع وراح مـرواح خلـي

الله على اللي لامشى يطوي الماد=طوي الرشا لاستدرجته المحاله
اليا انتهض ماله عن الدرب صداد=ولا للطريق اللي نويته بداله
واليا وقف كنه على عهد الاجداد=عوداً يوصي بالمراجل عياله
وصوته ليا منه عطا الحزم وانقاد=صوت بدوياً سارحً في حلاله
من عقب ماقهووه دله وبراد=هيجن على الحره ونكس عقاله
ولونه كما برقاً مخاويه رعاد=يبرق ورعاده يزلزل خياله
اليا تسند زاد واليا انحدر زاد=من طيب ماطوره وزين اشتعاله
والدار لو دونه مسافات وابعاد=عليه عندي مثل شرب البياله
وبين المواتر لاحصل زوم وعناد=والله لايفهقهن ويسري لحاله
حتيش لو قدمه ردارات وارصاد=من عانده ماطاب حظه وفاله
ياجاهلين الرنج ماعنه مقعاد=مركب هل الطالات واهل الشكاله
ماهو مهم بكاش ولابالاقصاد=بس المهم انه جديد الوكاله
ياصاحبي والله يالين الولي راد=ماياقف الا عند راعي الجماله
فيصل حفيد اهل الاشده والامجاد=حكامنا اللي حكمهم بالعداله
عاشوا على الدنيا سلاطين واسياد=سلالتً متسلسه من سلاله
ويوم انها خيل ومناويخ وطراد=بسيوفهم هدوا سيوف الجهاله
عدوهم فالحرب ماعنه نشاد=ورفيقهم يمشي على ماطراله
الله جعلهم للوطن عز واوتاد=وموتن على اصحاب الفتن والضلاله
واليوم يوم الامن فبلادنا ساد=هم بيتنا اللي نستضل بضلاله
ياسيدي شوفك ليا حان ميعاد=يزيدنا هيبه وقيمه وطاله
فقلوبنا لك بيت معمور وبلاد=يافزعة المضهود ياراس ماله
لك فوق عد الطيب مصدر وميراد=يومن ولد اللاش تقصر حباله
تنشر لك البيضاء على روس الاشهاد=وتحمل على صدرك وسام الاصاله
فرحت عسير ولبست ثياب الاعياد=وغنا الجنوب وغطرفت لك جباله
وفرحوا بك اهل الدار شيبان واولاد=وابها وشرقي الخميس وشماله
وختامها مبروك يانسل الاسياد=والحمل مايشتاله الا جماله

انا بدوي ياناشدن عن مكاني = وارعى نياقن كلبوهن مغاتير
متباعدن عن مظلمات المباني=ولالي طعام الاحليب المصاغير
اتبع وناسة خاطري في زماني=ولاني بمن يحسب حساب المخاسير
يرتاح بالي عندها لو ثواني=وانسى همومك ياليال المدابير
هذي طراة العمر والعمر فاني=مايفعل الانسان كله مقادير

يامرحبا ياسيدي سلمان مـن بعـد الغيـاب=ترحيبةٍ يسبق رعدها فـي الخيـال بروقهـا
الأرض مشتاقة على شوفك كما شوق السحاب=إلابعد وأكثـر ولا نقـدر نوصٌـف شوقهـا
وانته لحالك غيث ياغيث الظوامي والركـاب=وانته تبارك فيك كل ارض ٍ تمشـي فوقهـا
يامفني الأموال يامعتق من السيـف الرقـاب=يالصارم الضرغام يامعطي الرجال حقوقهـا
من طيب راسك فاتح ٍ للخير وأهل الخير باب=تروف في شعبك وترفـى حالهـا وفتوقهـا
مالك شبيه الله يديمك غير مصقول النصـاب=وتشيب وصوفك جزال المفـردة وطروقهـا
اساساً أنته تنوصف فيك النمـوره والذيـاب=تأخذ من وصوفك مزاياها وحسـن فروقهـا
من هيبتك تزرع بذور الخوف فاللي مايهـاب=ومن سطوتك عين الحسد والظلم تعمي موقها
عالي شموخك والبستك المرجلة لبس الثياب=غلاك يجري في دمي أهل الوطـن وعرقهـا
ياكافل الأيتام ياعيـن الحقيقـة والصـواب=من دونك الأرواح نرخصها ونرخص سوقها
الله لايحرمك من فضلـه ويعطيـك الثـواب=في ساعـة ٍ فيهـا الأوادم ماتبـل حلوقهـا
يالنادر اللي ماكرك روس العوالي والهضاب=ياللي ماخاليبك عـذاب ٍ للطيـور وعوقهـا
عودتك لنا بالسلامة عيـد يادمـث الجنـاب=وشوفتك مثل الشمس لا طلت وبان شروقهـا
تباشري يانجد في سلمـان حـلاٌل الصعـاب=وزفي مشاعر شعبه اللي من غلاه تسوقهـا
الأرض مشتاقة على شوفه مثل شوق السحاب=إلا بعد وأكثـر ولا نقـدر نوصٌـف شوقهـا