بسم الله الرحمن الرحيم
لنه ولد عباد

عطر النـداء مايقبله(نافـخ الكيـر)=لوكان تقطف مـن وروده وتعطيـه
والطبـع لوغيـرت مليـون تغييـر=صعب(ن)على الانسان يخلف مباديه
عقله يصور قدمه النـاس تصويـر=ان الاوادم كلـبـوهـا تحـالـيـه
والشك سم يدممـر الرجـل تدميـر=ماعاد يعرف صاحبه مـن معاديـه
تجبرني الخـوه وتدعينـي مطيـر=على الوفا هرج(ن)نقولـه ونحميـه
ماهيب خوة تدهن السيـر ويسيـر=خوة رجال(ن)صادق الوعـد توفيـه
النا مع اهل الصدق غـاره وتوقيـر=حنا قضاة الصدق لاغـاب قاضيـه
واذا الخوي مالـه معـزه وتقديـر=ماني بمجبور(ن) على اني اماشيـه
رفقتك صارت مثل عـج المعاصير=اللـي رياحـه عكرتهـا سوافـيـه
ماهيب بسلـوم الرجـال المناعيـر=اللي لهم بالطيب حكمـه وتوجيـه
هذا جزا من يبـدي الـراي ويشيـر=لوكان مايملك سوى راحـة أيديـه
الفرق واضح مثل ابانـات والنيـر=كلـن علـى نيـات قلبـه هقاويـه
بين الخـوي اللي علـى الخـوه يغير=اللـي خويـه قبـل نفسـه يبديـه
وبين الخوي اللي سنونـه مكاشيـر=الشـك عنوانـه ومصـدر دعاويـه
من دوور الحنا بسـوق الصقاقيـر=ماني رفيقـه جعـل بقعـا تحنيـه
اللي يريـد البعـد للبعـد تسخيـر=ومن حب له غالي عرف قدر مغليـه
واللي يريد القرب يقصـر مشاويـر=ويقصر عن الطالات ممشى مواطيه
ماشيت من بعدك وفـود وطوابيـر=ولاعاد به شي(ن)على الارض غاويه
وان كان لك عود(ن) تمسيه بالخير=مره وانـا مثلـك بمـره وامسيـه
وان كان قدم لـك دلال(ن )مواجيـر=احذر تقهـوا دلتـه قبـل شاهيـه
خلك معه واليا انكسر ضله عصيـر=اخذ الدلال وصب لـه ليـن ترويـه
وان ناطحوك اربع رجال(ن)مداويـر=في مربع(ن)تشفيك روضـة فيافيـه
واحد تراه عبيد اخو سالـم الزيـر=واللي على يمينه محيسـن بناخيـه
واللي وراه يسار ابن عمـه عمير=والرابـع تعرفـه قبـل لانسمـيـه
لنّه ولـد عبّاد ريـف المساييـر=نفرح بشوفه حي وان مـات نبكيـه
ان جـاك قافـي لايخـدرك تخديـر=احسب حسابك لا تضيـع بمعانيـه
فرفش وعبر عن مشاعـرك تعبيـر=مغويك شك(ن)حدب الاضلاع حاويه
لاتعتـذر منـي فدتـك المعـاذيـر=الشك لامنـه طـرق بـاب ينهيـه
وان كشرت دنياك بالوجـه تكشيـر=اعنز على اللي ميت الخلق يحييـه
لاتنتظـر فزعـة طـوال الاشابيـر=واذا بغيت أيت خـوي منـت لاقيـه
يشهرعلى متن الهوى كنـه الطيـر=حّدر وسنّـد مالقـى مـن يناحيـه
الله يقدينـا علـى نـيـة الخـيـر=وكلن علـى نيـات قلبـه يجازيـه

المشاركة الأصلية كتبت بواسطة عبدالرحمن بن غلاب الميزاني (المشاركة 223276) عبدالرحمن العقيلي شاعر مبدع بمعنى الكلمه صح لسانك واعتلى شانك

المشاركة الأصلية كتبت بواسطة أبو راكان (المشاركة 223292) صح لسانك ولا تكفي شاعر من الوزن الثقيل. وتقبل اعجابي بالقصيدة

المشاركة الأصلية كتبت بواسطة عبدالرحمن العقيلي (المشاركة 223332) [CENTER]الشاعر المبدع عبدالرحمن العقيلي تغيب ثم تأتي بأعذب الشعر ...ما شاء الله كل بيت بقصيده وعيني عليك بارده يا ولد عباد أشهد أنك وفيت وكفيت بهذه الشامخه.. صح لسانك الآف المرات مع أنني أعتقد بان صح اللسان قد تعديت مرحلته تقول: بين الخـوي علـى الخـوه يغيـر هنا سقطت كلمة(اللي) أبن مصاول مرحبا ابوضيف الله تصحيح لما ذكرت حول التغيب عبدالرحمن لم يتغيب اطلاقا متواجد بشكل يومي حال دون مشاركاتي في هذا القسم منذو الاسبوع الماضي عدم نزول موضوع جديده لكي اعلق عليه مما يدعيني الى الاكتفاء بالتصفح فقط دون مشاركة انما انا متواجد بشكل يومي ها للتصحيح فقط يابوضيف الله وشهادتك فخر واعتزاز يابوضيف الله بهذا النص وغيره والملاحظة اللي قلت عليها تم عمل الاجراء اللازم الف شكر على مرورك وحظورك المشرق والمشرف دائما وابدا تقبل تحياتي[/CENTER]

المشاركة الأصلية كتبت بواسطة بناخي الزحزوح (المشاركة 223308) صح لسانك اخوي عبد الرحمن العقيلي ودائما ماتتحفناء بابداعك تقبل مروري