عديت رجم وفهقت الغيم قبل أسألـه =وأسرجت له من مهار الفكر واختالهن
وأخذت من مذهله ما سد عن مذهلـه =واللي على حالهن بقين على حالهـن
والضيقة اللي تجول الصدر مسترسله =بين المحاني وتتمشى علـى جالهـن
مدري سببها عتب وإلا انها مرسلـه =وان قلت من صبهن ما قلت من كالهن
وياصاحب الأمس زل العذر في منهله =وخل الروابع يطوّل صمت منزالهـن
تكبر اجابة ويدفن في الصدور اسئلـه =وتنبت هقاوي وفوح الظن مدهالهـن
وتجنب كبار الحقايق لو بدت مشملـه =وعلوم من حطهن وعلوم من شالهـن
وسلام ياعزوتي والعلـم هـذا اولـه =وركايبي جيت ادرهمهن على فالهـن
ولو كل من قال عن علم ازهله نزهله =كان الحوائج قضن من قبل نسعالهـن
والمعضلة ما بدت عند العرب معضله =ومن لا يروم الهقاوي مـا تهقوالهـن
وانا تحملت من حمل الزمـان جملـه =وجمـال تشتالنـا وثقـال نشتالهـن
وان كان في مدحكم تفاقمـت مسألـه =بالمدح تزهـى فعايلكـم ويزهالهـن
صوت على مطير والكايد يعرف اهله =نالوا من المعجزات اللي ما احد نالهن
اهل حميّا واهل سطوة واهل مرجلـه =وثلاث يتعب صليب الراس ما طالهـن
رجالهم لو يميل طويق جـا واعدلـه =موصى على النايفات يعدل احوالهـن
ولا ينقطع فعل وشعور اللحى له صله =ولو تدفن الروس تبقى حيه افعالهـن
كم رجل مات وبقى اللي بالذراع افعله =فعايله لو يطول الوقت مـا ازالهـن
ورّث من المجد مجدٍ ما أحدن يجهله =صيته بنا الطايلات وصاغ معدالهـن
تحت النصايب وغرسـه مثمرٍبنخلـه =ولـوازم أهلـه مقضيـات بجمالهـن
ورجال لو طال عمره و الزمان أمهله =لا سر ربعه ولا حاجاتـه اشتالهـن
والطيب وهبة ومرقاب العـلا منزلـه =والحر يستـدرج الشّـرّد ويحتالهـن

صح لساانك مدد بلاعدد
يشيلك الجمل وتشيل الثقيلة يابو نواف وكفو
ومرحبا هيل عد السيل وتواجدك معنا يعني لنا الكثير
والكثير وأتمنى أن يستمر تواصلك

"

مطلق بن دعيج