البارحة غـير وتفـاصيلها غـير=هزن ثوانيها سنين امنياتي
وفلت شريط الـذكريات بمحـاذير=ولمت خيوط اقبالتي مع شتاتي
دارت احداث تصير واحداث ماتصير=ومرن خطاياي وتبرت شفاتي
واجهـشت والعبرة تسوقه مـزابير=دمعٍ حدر سيله وحرّك ثباتي
وهزيت غصن وفاح صدري مباهير=وزليت فنجال وصحن ذكرياتي
وانساق مظهـور وتلاشت مظـاهير=وتبدّلت في خطوتيني حياتي
ونبـت على صدر الملاحـم نواوير=وكبرن عزاوي مبعدين المباتي
قلت اعـتزي بجموع ربعٍ مغـاوير=قومٍ تسامى من سماهم سماتي
وليا اعتزى حامي حمى كليب بالزير=ناديت يا اهل الخيل والمعـجزاتي
لكن هـاك السير ياداهــن السير=واحسب حساب الوقت واحفظ وصاتي
تصغر بنظرات الكرام المخاسير=وتكبر جيوب مدورين الفتاتي
وتضيق بعيون الضعـوف المشاوير=وتقصر بخطوة طالب الطايلاتي
ويـواسد الجمة قـليل الـمـداوير=وتابس ورا طرد المراجل لهاتي
وتشـح يمنى مسـمّنين المعـاذير=واجود بالموجود والخير ياتي
وافرح ليا جوني ربوعي مسايـير =لوكان مااملك وقتها الا عباتي
لن الحيـاه ارزاق رب وتـدابـير=وبين المهد واللحد بضع اخطواتي
ويارب عبدك لو كبر عندك صغـير=وانت الولي يامسيّر العادياتي
يالله تكـبرني بنظـرة هل الخـير=وتكتب لي السجدة ليا جا مماتي
عشان لا سيق الخـلايق طـوابير=ابعث وانا اخر ماكتب لي صلاتي