قصيـدة وجــه الغــــلا للشاعر: مطلـق بن شويـه


اقبلت ياوجه الغلا .. حيّ هالزّول
زول تغيـب عبـاد ربّــي لـيـا غــاب



تطلع طلوع سهيل من حـول لا حـول
وتشّخص لك عيون .. وتلافت لك أرقاب



ومن يوم جيت الله وكيلك علـى طـول
سلامك عتاب !! وسواليفـك عتـاب !!



طوّل علي بالك عسـا عمـرك يطـول
ماكل موقـف تنشـرح فيـه الاسبـاب



عطني يدينـك وأنثـر الليـل مجـدول
خلّه يطير أسراب .. ويعـوّد أسـراب



وأضحك وفرّق جمرتينـك عـن اللـول
بفتح لك سموعي قبل مـا افتـح البـاب



خمر الكلام اللي مـن شفـاك معسـول
أبيـه يـدرج فـي عروقـي وينسـاب



سوالفـك فيهـا مـن السحـر مفعـول
تأثيرها علـى الجـوارح والاعصـاب



بأملا عيونـي مـن تهايـاك وأقـول :
ياوجـه صبـح ٍ لبّـس الليـل جلبـاب



عذر القصيد إليا قصـر عنـك مقبـول
أوصافك أكبر من مدى شعر وإعجـاب



عـودك معـزّل ومتنهّـض ومفـتـول
اليا تعـدّل رمـح واليـا انحنـى داب



ومعنّقـك فـارع و زامـي ومنـتـول
وصدرك جمـع مالـذ كلّـه وماطـاب




وسودك طلايع قـوم وسيـوف وخيـول
خيّالهـا يـارد علـى المـوت ماهـاب



ايّووووه من صحوة هدبها ويحّـووووول
وإن سلّهمت ( هذا بلا ابوك ياعقـاب )



قريـب لكنّـك بعيـدٍ عــن الـنـول
وا حـر كبـدي حـرّة الظـن لاخـاب



ماكـل مجـدٍ يبلـغ المـرء معـقـول
اللي ماجاب حصان أبو زيد وش جـاب



من لا جمع راسك براسه علـى طـول
والا يقضّـي تالـي العمـر عــزّاب