منتديات الموازين الرسميه - الارض مثل النفس تجزع وترتاب

منتديات الموازين الرسميه (http://www.almouazeen.com/index.php)

- الشعر العام والفصيح (http://www.almouazeen.com/forumdisplay.php?f=34)

- - الارض مثل النفس تجزع وترتاب (http://www.almouazeen.com/showthread.php?t=31291)

الارض مثل النفس تجزع وترتاب

الارض مثل النفس تجزع وترتاب=ماتنبت إن كان السماء علقتها
إن ما مشى بالوسم وديان وشعاب=ماتنفع الامطار لوغرقتها
ولو زان وجه الارض بزهور واعشاب=جتها الهبوب العاتية واصفقتها
المرجلة ماهي ب/في فتل الاشناب=أهل اللحى في هالزمان حلقتها
أسمع تصاريحا على لسان كذاب=كذبة طمع وأصحابها صدقتها
وسط البيالة ملعقة سمها ذاب=وأشوف ناسا حركوا ملعقتها
طبخة هوان وذل يطبخ بها غراب=مافيكم اللي ما يذوق مرقتها
أوراق غدر وحقد في داخل كتاب=والريح من يم الشمال طرقتها
العام ماخوذ(ن) من أطنابنا أطناب=واليوم بحرين السلام ورقتها
وان ما وقفنا صف في وجه الارهاب=البندق العوجا تثور فشقتها
وليا اتحدنا نشنق أرقاب الاحزاب=وليا اختلفنا ولمت مشنقتها
والحية اللي تخفي السم باللناب=صيداتها لاجا الظلام درقتها
دون الخليج ارواح واعمار وارقاب=للموت سكرة والنفوس عشقتها
بالمعركة تاتيك للموت خطاب=وان عينت سومات موت فرقتها
أهل الخليج عيون وشيوخها أهداب=بايمانها وبحبها طوقتها
خليجنا يلبس من العز جلباب=بشته سهوم الحقد ما شققتها
سفينة(ن)تبحر ويحسب لها حساب=بامجادنا صعب البحور فهقتها
وان ماغدينا دونها ستر وحجاب=سود اليدين الغادرات خرقتها

زياد بن حجاب بن نحيت