راكب اللي مامشن محركاته = تو جا المينا على ظهر السفينه
طالبه شغموم عِشقه حُب ذاته = رنج روفر والختم فوق المكينه
جَهزه من مصنعه بمواصفاته = كل شي بِرمج على لمسة يدينه
شاشته رادار ترسم مُجرياته = لامشى بالخط تكشف راصدينه
دبلوماسي لونه وفي مقعداته = النعومه لاجل راحت راكبينه
والابنص ان لامست رجلك شباته = فز فزت ديسكفر يسبق رطينه
منوة اللي شوقه ابعد عن حياته = مايصله الا الذي عايف سنينه
ظبي نادر بالحيا كامل صفاته = من قدم رِجله ليا هامت جبينه
لاتوشح برقعه واسبل عباته = زاد من قدره على قلبي سكينه
صرت انا اغلي نجد من زايد غلاته = لومافي نجد لي مطمع كبينه
يارسيلي لاتهنيه بمباته = دق سلفه واستلم خط المدينه
واتجه للشرق هات العلم هاته = من عديل الروح خافيه استبينه
هل على ماكان والا افكار جاته ؟ = اختلف ظنه وشكك في ظنينه
عطني المضمون واستدرك وصاته = واخبره اني على عهده ودينه
وان جهلت الدرب ابحث عن ثقاته = من ورى ظَلم اسأل اللي عارفينه
لاتجي الا بعد تاخذ رواته = والحذر يامرسلي تبحث كنينه
وارجع بليلك قبل تاخذ سباته = عطني المضمون من عند الضمينه