يامرحبـا ترحيبـةٍ ريحهـا طيـب=واحلى من السكـر لذيـذٍ طعمهـا
الله يحيـي ربعنـا والأصاحـيـب=وكل الحضور ضيوفنـا وانخدمهـا
ليلة فـرح فيهـا نزيـد التراحيـب=حيّ الرجـال بحلّـة اللـي عزمهـا
فهد ولـد مـرزوق راع المواجيـب=رجله على الطولات يتعـب قدمهـا
معصبٍ راسه على الطيب تعصيـب =يتبـع دروب المرجلـة واغتنمهـا
ولا شحّ بالدينار والقـرش بالجيـب=ونفسه تحبّ اهل الكرم من كرمهـا
واكبر دليل بموقف النبـل والطيـب=بين الرجال اللـي رفيعـه اشيمهـا
بين العتيبي والمطيـري تعاجيـب="سمّى الولد فيحـان والله قسمهـا"
سمى على (فيحان) حـرّ المراقيـب =فيحان مـن قـومٍ قويـه اهممهـا
فيحان من رؤؤس الرماه المعاطيب =عتبان يوم الحرب حامـي وحمهـا
قدام لا تصفـي بنجـد المشاريـب =والرؤوس ضرما والمعارك ضرمهـا
يشهد لهم بفعولهـم جايـع الذيـب =كم سابـقٍ خلّـوه يفـرس لحمهـا
يروون حـد المرهفـات المحاديـب=وكـلٍ شهـد بفعولهـم واعتلمهـا
أهل المهار ومتعبت شمّـخ النيـب =قطعانهم فـي نجـد محـدٍ دحمهـا
لطامة العايل عـن الشـك والريـب=وذباحـة الحايـل وهـذا سهمهـا
وفيحان ذكره شاع بيـن الاجانيـب=وأغلا الجوايـز باليديـن استلمهـا
هدّاج تيمـا فـي ليـال الملاهيـب=يسقي الكبود اللي ظماهـا زحمهـا
هو فزعة اللي صك دونـه لواليـب =ومن دونه البيبـان جـوّد لجمهـا
ومن شان مخلد ماعتذر عنه بصعيب=مسـك مفاتيـح القفـول وبرمهـا
وهانت على الطيّب اكبار المطاليـب=اللـي تعـلا حصنهـا واقتحمـهـا
يوم الردي يمناه تقصر عن الطيـب=وعزي لمن نفسه تمـوت بوهمهـا
لا حاش طيب ولا تدرى عن العيـب=واخير من طيلـة حياتـه عدمهـا
والحر كسبه من طـوال المخاليـب=والبوم بـوم ولاتنومـس اغممهـا
وعفواً عن التقصير ياهل المواجيب=اهـل العقـول النيّـره نحترمـهـا
ولا كل من يرمي للاهداف بيصيـب=ولا كل سبـاح البحـور ايغشمهـا
ومـا قـل دلّ وللمعانـي تراكيـب=واختامها بازكـى صـلاه انختمهـا
على النبي اعـداد خـط المكاتيـب=اللي نصح كل العرب مـع عجمهـا