منتديات الموازين الرسميه - محاوره بين الشاعر تركي الميزاني وملفي المورقي

تركي
ياسلامي على اللي معرفتهم تجاره
من سلايل بني قحطان سقم الاعادي

ملفي المورقي قرر وغير قراره
والله أعلم يجوز الوضع ماهو بعادي

ملفي
مرحبا فالمحل اللي رفيع شعاره
عد من جاب دعوتهم ونادى المنادي

ملفي المورقي للمرجله شب ناره
يوم بعض الاوادم ينفخون الرمادي

تركي
احسبنك منول ماتكب الصداره
لين شفتك عن الدرب الصحيح متحادي

يابن الاجواد شب النار ماهو شطاره
الفتيله تولع من قديح الزنادي

ملفي
رح لدارك وملفي عايشن وسط داره
انت مانت بخشيرن لي بملحي وزادي

أحفظ الرمي يالرماي واحفظ عياره
مايفك الحلوق الا طوال الايادي

تركي
أدري اني ماحصل منك غير الخساره
وان بغيت الحقيقه مانت غاية مرادي

ماجبرناك لاجل توقع الاستماره
اعتمدناك وانته ماعليك اعتمادي

ملفي
ودي اسقيك ياتركوه كاس المراره
كيف ماجرح فوادك وانت تجرح فوادي

تحسبني جديدن في فنون الصداره
مادريت أني اقدم منك فوق الشدادي

تركي
أنت رجلن تحب العولمه والحضاره
مانت راعي صباح ولانت راعي هجادي

لو البسك يابن روق بشت الاماره
والله اني لاجيك الصبح والبشت غادي