منتديات الموازين الرسميه - عبد الله الميزاني ومستور العصيمي

عبد الله

مستور شعبي وهو من شعب عاد وثمود = اللي فنت مـع منازلهـا منازيلهـا
العام راعي جمل واليوم راعـي قعـود = وام الكبايـر ليـا غـنـت يغنيلـهـا

مستور

مستور شعبي ويرقى يالمطيري سنود = اعرف وجيه العرب واعرف مداخيلها
من مهبط الوحي ماني من بلاد اليهود= وأم المناديل مأفتش مناديلها

عبد الله

انا ادري انك على بعض الكلام امحدود = لا والله الا عتيبـه مـا سـرى ليلهـا
ليتك ليا ولعـت نـار الفتيلـه تـزود = وتشيلك الجن بعـض ايـام وتشيلهـا

مستور

قرب خشوم الفتايل من خشوم الزنـود = ياويل نـاس تشيـل الحقـد ياويلهـا
ياكثر حوم الضوامي فوق روس العقود = من يوم راعي الغنم جانـا يتاحيلهـا

عبد الله

خابرك وانته ولد مثلك بعد جيت عود = الله والا الناس وان قلت محاصيلهـا
انتم على اربع جهات اقلوب والا كبود = ما باقياً من عتيبـه غيـر اقاويلهـا

مستور

انته تعرف الرجال امعربين الجدود = وامورك الثانيه مانـي بفاضيلهـا
قال المثل ياولد كلاً بجوده يجـود = تبدي لك الشمس من قدام تبديلهـا

عبد الله

البرق يخلعك ويضحك رقص الرعود = وش حيلة اللي تطيح ليا برد حيلهـا
في معرفتك اطيب الضباط والا الجنود = في ساعة الناس تحكي لك وتحكيلهـا

مستور

الله يجيب الفرج والله يحل العقـود = نبا نكّسر علـى الدلـه فناجيلهـا
خلك على حد واحد لا تعدى الحدود = واطلع من التلعه اللي منحدر سيلها

عبد الله

انته ليا صحت للواعين تصحى الرقود = كلمتك هـذي يهـم الغيـر تسجيلهـا
.................................................. ....................
مستور

ياليت بيني وبينك حال عرق النفود = بعض الدعاوي تمرك منت صاحيلها
اليا عطى الله مايمنع عطاه الحسود = ركابت الخيل ما تصلح بلا خيلهـا

عبد الله

ماهو بنا اللي يجيب من العدم في الوجود = علـم عتيبـه تعجـل فـي مراسيلهـا
ابغاك تعقل وتركد وانت ما من ركـود = بالله رد الجـهـالـه لا توهـيـلـهـا