ياداعج العينين ياناقش الكف=ودك يكفيني وزينك يكفي
معاد لي رغبة ولاعاد لي شف=الا انت ياسيد الغنادير شفي
الخط عن غيرك مقطع ووقف=وانا عن الخط المقطع مقفي
وانت الوحيد اللي لك القلب هايف=مالوم قلبي في هواك استخفي
ياللي غلاك يلف قلب العنا لف=ماني مكثر حكي هذا ملفي
هذا ملف الود ماهو مزيف=وأهدي معه باقات ورد تزفي
بأغلا المنازل والجمال أتشرف=ماقف على بيبان بيت مطفي
اللي يدور نقطة الضعف يضعف=والمقبرة معياد كل متوفي
عليك بيبان الضماير تراجف=مالوم قلبٍ من بطاك استحفي
ياعود ريحانٍ ليا شيف قيل أف=عليك ذعذاع الهبايب يهفي
بالزين في الجو المناسب تكيف=الله عليك بزود ستره يضفي
ياللي هدب عينه كما عسكر صف=عساكر في كل واجب تصفي
معطيهم القايد يمينٍ تراصف=حرس شرف قدام ضيفٍ ملفي
ضيفٍ على الدولة عزيزٍ مضيف=في موكبه خضر البيارق ترفي
ياللي جبينة مثل برقاً تكاشف=وبلة على الأرض السنين متكفي
بعدك يحسفني ومنه أتحسف=وآخذ وأبين من غلاكم وأخفي
ان كان في وجهة نظرنا تخالف=لاتشغلين البال كفي وعفي
وكلٍّ عَلِم مايشتهي ويتصرف=الصحف تطوى وأزرق الحبر جفي