منتديات الموازين الرسميه - رؤيا للوالده وأخرى لي ..

السلام عليكم ورحمة الله وبركاته
هذه الرؤيا للوالده بعد صلاة الظهر رأت انها في بيت وكان فيه فراش عليه مويه وسخه وامي رفعت الفراش عشان تطلعه برى وفجأه وهي رافعه الفراش طاح علب وأكياس وأنكب منها رز بس كان مره مهروس كأنه مهلبيه وكان مره كثير لدرجة أنه خرج من تحت باب الغرفه وكأن أمي زعلت وقلنا لها هذا خير قالت لا مو خير هذي قذاره وبعدين أمي نادت واحد من أخواني عشان يجمع معاها الرز وكان في حوش مقابل للبيت وفيه غنم وفي ناس يذبحون في الغنم وكأن فيه مناسبه وأمي تقول لاخوي أرجع تبغى تخبي الموضوع عن أخويه الكبير .. انتهى

وأنا رأيت رؤيتين قبل أسبوعين تقريبا
الاولى: شفت نفسي بشارع وكنت رايحه ابشتري أغراض للبيت وشفت سيارة أبوي بالشارع الثاني وانتبهت ان معاه وحده وأقطع الشارع و أروح لهم ورحت للحرمه وكانت (اندنوسيه) وقلت صباح الخير بابا وكان متفاجأ اني شفتهم وصرت أتكلم مع الحرمه بالانجليزي وأسألها وكان في ولد في السياره عمره تقريبا 6 أشهر وباين أن بابا متزوجها وكنت أسألها هذا ولدك قالت ايوه وكانت هي وأبويه مبسوطين وكانوا جنب بقاله صغيره كان يبغى يشتري لها أغراض ورجعت البيت وأحكي في أختي وأقولها احنا لونبغا شي ماجاب لنا وهو رايح يجبلها أغراض أصلا أنا شاكه في روحاته لفلان ( واحد من أصحاب الوالد) ودائما يتأخر أصلا دوبني عرفت راتبه وين يروح.. انتهى علما ذي مو أول مره أحلم أن الوالد متزوج على أمي وخاصة من الجنسيه الاندنوسيه.

الثانيه : رأيت اني أنا وأختي وأخوي كنا في البيت القديم لعمة أمي وجات وحده من معارفنا وهي متزوجه من كم سنه وقام أخويه سلم عليها وحضنها بقوه والبنت أنحرجت بعدين بعدت أخويه بالقوه عنها وصافحته قالت له أن كيفيك طيب قالها بخير ورحت أنا ويه وجلسنا على كنبه في الصاله وأخويه رجع راسه على ورا وباين عليه التعب وقلت له شوف كل بنت بغيت تتزوجها راحت قولي متى بتتزوج؟ طيب في بالك أحد معين؟ قال اها لو أقولك دحين تروحي تقولي لامي قلت والله الي بث الروح فيني أني ماأقول لاحد وكنا نسولف فجأه أختي كانت جالسه في الارض وتنادي بصوت عالي على أختي الصغيره (بشرى) وكان في ناس نعرفهم اخوات يلبسون الشبكه لوحده من بناتهم ولما اختي نادت بصوت عالي قالت وحده فيهم أستغفر الله باأحتقار وأنا قمت من عند أخويه وقلت لها سلامات عسى أختي ماعجبتك وصار نقاش بيني وبين وحده فيهم وأضطريت أنا أنهي النقاش وفجأه قاموا زفو بنتهم على أساس أن المناسبه شبكة هذ البنت واصلا ماكان في ناس غير هم وأحنا وأنا مستغربه أش جابنا عندهم .. انتهى علما بان الناس ذولا ليس لهم ود اتجاهنا نهائيا وأحنا كذلك .