ساند سند2016 ...عبدالرحمن العقيلي
 

قصيدة #ساند_سند2016م


بسم الله الرحمن الرحبم

العين ماتعلو على الحاجب العين
=لاكنها اغلا منه ماهيب زيه
ارقاب تعتقها مئات الملايين
=وخمسة عشرمليون صارت قضية
وين الرجال المخلصين السلاطين
=اللي لهم بين القبائل هويه
الى متى وحنااصبر شوي بعدين
=والعذر رقم حساب قيد الوصية
وأبوك حنا محررين المساجين
=نمشي بشرع الله وسنة نبيه
خمسة عشر مليون ماتنحسب دين
=لاقام حظ اهل ألوفا والحميه
وهذا سلام لـ كل من عقْب حسين
=اللي لهم حقٍ كبيرٍ عليّه
وذوي سعد ذوي محمد على العين
=أهل الكرم واهل العزوم القوية
حي الخيال اللي بدا نوه يُبين
=اقبل علينا شوي واقفا نويه
ربعٍ تبى الفزعه وربعٍ معيين
=والصمت خيّم فوق روس البقية
قالو: سند مايختلف دونه اثنين
=مير الديه ماهيب واجد بليه
قلت اييه مير اللي يبى يسدها وين
=هاته ولك عندي قصيدة هديه
ومطير تنظر موقف الربع الادنيين
=من الحجاز اليا الكويت الابيه
والله لو جُمٌعتها من ريالين
=لـ يمسي سند في مسكّن العبدليه
هنا نميز من هو الزين والشين
=وراع ألوفا ! من اللي عزومه رديه
يـ الربع حنا ربع بالعسر واللين
=وسند مايبغى منكم اللي سميه
جريح يـ مساعد وانا في جرحين
=وخذلك على الجرحين خمسين كيه
قمت اتقلب وانظر يسار. ويمين
=واخشى يقال فلان من هو خويه
لا تنهم الاقصين قبل الموالين
=حتى ولو نخًوتك عن حسن نيه
حولك سباعٍ مثل سحم السراحين
=توفي الديون وتقطع المهمهيه
خل الموالي يوصل العلم الاقصين
=وشف ويصير الصبح والا: قفيه
وبكره يجون عيال عاقل ملبين
=مطير تدري مالهما معذريه
وتمسي يـ ابومتعب طليق الحجاجين
=مع فرحةٍ تشفي النفوس الشقيه
الشمس لو غابت ترا بكره. تبين
=ونفرح بـ عيدٍ مثل عيد الضحية

""عبدالرحمن العقيلي""