لاتحسبين العرس توفـي وكتكـات=ولا تحسبينه توكـس والا بونتـي
ولاتحسبين العرس تصفيق واصوات=وانتي على صوت الغطاريف همتـي
ولا تحسبين العر س كيكة وطرطا ت=وصله قطعتيهـا و وصلـه بلعتِـي
ولاتحسبين العرس كوشة ولمبـات=وانت كما الطاووس فيهـا جلستـي
ولاتحسبين العرس احلام في الشات=يامـا بنيتيهـا ويـامـا هدمـتـي
ولا تحسبين العرس روحة وجيـات=هيا اقضبي بيتك عسـى مانهبلتـي
ليلة سعيدة وانت احلـى الجميـلات=تشخص عيون الناس اذا حضرتـي
(واللاينر)حطيـه بــلا زيــادات=لا يخـرب المكيـاج اذا دمعـتـي
(والمسكرة)تحتاج لطـف ومـدارات=حتـى يبـان الزيـن اذا غمضتـي
(والاسبريه )رشيه حتى البصيـلات=ينسك شعرك زين ولو كان زدتـي
وترى(المحدد)فن يحتـاج رسمـات=يبـان رسمـه زيـن اذا ابتسمتـي
العـرس يابنيـة ماهـو شعـارات=تفنـى مراسيمـه وتبقيـن انتـي
ويبقى شريك العمر راعي الطويلات=هذا هو العرس الحقيقـي عرفتـي
اول نصيحة لـك حفـظ الصلـوات=صلي العشا والفجر في كـل وقتـي
وفي ليلة العرس الموفـق وبالـذات=ادعـي الكريـم الله اذا سجـدتـي
والتعري لاترضين عند الكوفيـرات=ولبسك يملـي العيـن اذا لبستـي
واللي على زوجك تحرضك مـرات=ارجـوك شوتيهـا شوتـت بلنتـي
والصبرفي العشرة حتى على فتـات=ياماحـلا فعلتـك يومـك صبرتـي
واذا حفظت السـر مـع المـدارات=زوجك ترى في عيونه انت كبرتـي
والسوق يعني هاه وقت الضرورات=والاتـرى زوجـك يـدور لمفتـي
زيدي الغطاية وكثري في العبايـات=والله يرضـى عنـك اذا ستـرتـي
اوصيك بالكبسة وكثـر الإيدامـات=حتى لو إنك مـن سببهـا متنتـي
وخلي الرجيم اللي فشلتي في مرات=سويـه مـرة واحـدة لا ولـدتـي
اوراق شاعر يرسل ازكى التحيـات=خصيـه بالـدعـوة اذا دعـوتـي