يالله يالمعبود يارازق الطير = ياللي ماغيرك واحدٍ نلتجيله

ياعالمٍ بالحال مايعلمه غير = وانت الذي مدات جودك جزيله

يالله من نو المزون المزابير = ترسل علينا الغيث باحسن وسيله

لين الفياض الخضرتنبت نواوير = والارض تكسوها الخزاما الطويله

وبرحمتك ترحم نياقٍ مصاغير = عاشن على المطعــــوم يومٍ وليله

مطعومهن ماغير برسيم وشعير = وارواحهن صارت ضعاف وهزيله

جاهن من الايام ضده وتقصير = وعقب الغلا بيعــــــن بقيمه قليله

من عقب ماهن يشبهن الطوابير = سود البكار الطيبات الاصــــــيله

وعلى لبنهن عاش فقران وصغير = يوم الليــــــــالي بين عدله وميله

حامينها اللي ينطحون المقادير = ومن دونهن حد السيوف الصقيله

واليوم صارن في شبوك ومحاضير = يديرها هنــــــدي مضيع كفيله

يمه تناظر حزة الصبح وعصير = تبغا علفـــــــــها من يدينٍ بخيله

مثل السجين الي دموعه شخاتير = وده على الممشا وعيت تجيـــله

يالله تبدل حالهــــــا بالتياسير = وترسل عليها من صدوق المخيله

يالله يالمولى حســـــين التدابير = رحمتك نرجو يا مزبّن دخيـــــله

المشاركة الأصلية كتبت بواسطة سيف الشجيع (المشاركة 49222) صح لسانك يابن غلاب قصيده جزله من شاعر جزل فالك التوفيق ومافيك حيله >>>> ولا تحرمنا من جديدك