منتديات الموازين الرسميه - تل قلبي تل ركب المهمهيه (فتاة الوشم) ورد محمد بن سبيل عليها

تل قلبي تل ركب المهمهيه

الشاعره (فتاة الوشم)ا

تل قلبي تل ركــــــب المهمهيه =يوم خف الشيل وشنونه طووهـا
في ليهب القيظ صبحه مع عشيه =بالمطارق والعراقيب الهدوهـا
والموارد خوف والدار اجنبيه =والدروب العوج معها سخروها
ماطرقهن في قديم الوقت فيه =بالمغازي والمناكيف اتعبوهـــــا
منوتي ريحة هوى نجدالنقيه =في خلاًًََ منه الجوازي جفلوهـــــا
ماحلا من عقب مزنه عقربيه =جرة العساس فيها مالقوهـــــــــا
شيدو بيت الشعربارضٍ عذيه =شف بالي ربعته يومارفعوهــــا
طوقه نبت الخزامى و النصيه =في رياض بالجوايل مارعوهـا
وانزلوه اللي يمانيهم سخيه =وعلقوا ضو المناره واشعلوهـــــا
واحتما محماسهم بأغلى شريه=والدلال الصفر بالصالي شوووها
وقدموفنجالها مثل الهديه =بعد ما بالهيل الاخضر بهروهــــــا
دق نجر يجذب الساري عويه =ماتوزا وبالمطابخ وطحنوهـــــا
يوم جيبت مثل مجهول الهويه =ماتسر ونارها ماشاهدوهــــــا
دلة لو قلطت بالطوفريه =ماتساوي اللي على المله جذوهـــــا
تجمع الظفران ورجال الحميه=والسواليف القديمه حدثوهــــا
في البطوله والخوي ويا خويه=من عهودجدودهم مازيفوهـــا
يامحمد يازبون الدوبليه =عيني اللي لمة البدو حرقوهـــــــــا
مشغلين البال والعين الشقيه =ليت نفسي بالوعر ماعلقوهـــا
للبيوت السمر عندي جاذبيه=ليتني سجيت مع ناس نسوهـــا
اه وعزاه دام الروح حيه=من طبوع للقبايل سيبوهـــــــــــا
بدلوها بطبع ماله قابليه =وستعاروا لهجة ماعلموهــــــــــــــا
راحت الشيمات يامحمد ضحيه=والتاليد العريقه مابغوهــــا

ردالشاعر محمد بن سبيل عليها

فزقلبي من وصول الخط ليه=فزت ام في ولدها بشروهـــــــــــــــا
غايب عنها ولا له مقدريـــه =منشغل منه المعازيب حرموهـــــــــا
مرحبا ترحيبة النفس الرضيه =بالرساله وباهلها ومن احضروهـــا
يافتاة الوشم لك مني تحيــه =شاعرة نجد العوارف رشحوهـــــــا
تشتكين الشوق للماضي عليه=منوتك شوفة بيوت شيدوهــــــــــــا
شوفت الحوال بديار خليه =خلفهم باقي دبشهم عقبوهـــــــــــــــــا
بيتهم بالقيظ تسداه بدويه=ونهته قبل المخايل وشكروهـــــــــــــا
والحنين لذيك الايام الهنيه =يوم اهل نجد العمايرمابنوهـــــــــــــا
لايزيد الشوق وتزيد الشكيه=البيوت السمر اهلها بيعوهـــــــــــــا
العراوي صار من عقب المطيه=مركب البدوان وجموس شروها
وبعد ماكانو يربون الرعيه=الذبيحه لابغوها دوروهــــــــــــــــا
ماجعل روحي على حوض المنيه=غير تذكاري طبوع بدلوهـــا
لطرت لي عيشة البدو الحليه=والحياة اللي بعظهم سمجوهـــــــا
جض قلبي جض من ضيع خوبه=في ديار مقفره ماسنعوهـــــــــــا
وزادت اشواقي وحسراتي خفيه=للسنين اللي جدودي عاصروها
وماحلا صيد الضبى بالبندقيه=لين حدوها على الخيل ورموهــا
وماحلابالبر عزف السمسميه=والربابه في يدين من عشقوهــا
ماتقهوو من قهوة الزمزميه=دلة الرسلان ساعة بهروهـــــــا
وختلاف الوقت نعتبره زريه=عيشة الماضي بكو من جربوهـا
هذه الدنيا على العالم جريه=هي تجاهدهم وهلها جاهدوهــــــا
وسلمي يابنت حامين الونيه=مابدت شمس النهار و طالعوهـــا

منقووول

أبن مصاول: لله در الشاعره فتاة الوشم صراحة قالت واجادت من كل جزل وقوة معنى
وصح لسان الشاعر محمد بن سبيل فقد قال فأجزل القول.

هذه القصائد بعد التنسيق وتصحيح كثيراً من الأخطاء الإملائية ويمكن بقى بعضها بسبب العجله.