الجيب نحرته طريق خلاوي= وثوغ غباره وانطلق تقل منحاش
زان الطريق وعيّت الرجل تاوي =من دوسة البنزين معاد يناش
فز وكفخ كفخة خطاة النداوي= اليّا كفخ وهوا على برق الارياش
ماله ثمن مركب بعيد الهقاوي=لو زودوا تسعيرته كنها بلاش
يصبر مثل صبر الخوي الحياوي= الطيّب اللي كل ماتزهمه شاش
مهما وصفت الجيب وصفه بلاوي =عزالله ان مصمم الجيب حشاش
والله مقلد بالبخيل الغناوي=عقب اشتريته قيمته كلها كاش
وليا نويت الدرب مابغى مخاوي = اهم شي ابعد عن النذل واللاش
مدّل مدري ياهل العرف غاوي= قبل امس وامس مقيم واليوم طراش
من القصيم اليّا الحفر والصداوي=واردها ليسر طميّه وعكاش
يسوقني غصب الزمان القساوي = وانا مداني عيشة النذل لاعاش
لو مت فقر وجوع ماجيه ضاوي= ولاهين نفسي بين رعيان الادباش
كله ولامنت عيال الشواوي =البعد عنهم حق وارض الله فراش
اخاف يلقى فرصته كل واوي=ويصنع من الابره ثمانين منقاش