صباحكْ ضاحك(ن) أخضرْ وانا صبحي مع الكافـــور
مع السدر ومع الصندل .. صباح الطيب (يـ) الأكفــان

صباح اللحد و الغربة (يــ) حفره ما وطاها النــور
بعد ما صار يسكنــها غريب(ن) واصبحت أوطـــان

(يـ) عمّي: ودنيتي بعدك قصيدة بيتها مكســــور
(يـ) عمّي: والدفا حضنك/ (يـ) عمّي: و الشتا خــوّان

(يـ) عمّي: ها الفراغ اللي تركته قد صرخ مجبــور
بكــت سدرة تربيــها .. بكــت واتشقق البنيــان

(ي) عمّي: وريحتك..عطرك و مذياعك مع (السنطور)
بقايــا ما بقى بعــدك .. رحيل(ن) عتّـم الجــدران

غياب(ن) حس به بابك/ حصيرك/ بيتك المهجـــور
و سجــادة صلاة(ن) لكْ حزينـة جنبــها قـــرآن

غيابك حس به كل حي .. بكاك الفجر و العصفــور
بكتك الشمس و القمــرة .. بكتك الأرض و الجيــران

غيابك حس به طفل(ن) سكن فيني.. بكى (معـذور)
تذكر: درهمـك/ عطفـك/ حنانـك/ بسمتـك / إنســان

نزَف غربهْ ولهْ يا عم .. رجَف دربه ..وقف مذعـور
فتح عينه على واقع و كــان يامــا .. ويامـا كــان

طفِل مأسور في جده لقى نفسه غريب الـــــدور
حكى قصــةْ حزن أســود و قال و قال: ((يا إخــوان

حفرنا حفرتـه نبكـي -نعم نبكـي- وهوْ مسـرور
شهيــد- وليه ما يضحك- و داره جنّــة الرحمـــن

و غطيـــنا الجسد بتراب .. تنْزف هالعيون شعور
ألـم/غربـة/ وجـع/ حيـرة/ تنثر (مـ) الحنين ألـوان))


صباح اللحد و الغربة (يـ) دار(ن) قد دخلها النـور
بعد ما صار يسكنــها شهيد(ن) و اصبحت أوطـــان

صباحي عابس(ن) أصفر .. رحل عمّي مع الكافـور
مع السدر و مع الصندل .. مـع الطيب و مـع الأكفـان