لاضاق صدري من جميع المخاليق =ولاعاد يحلالي كلام الخلايق
عن هامتك ياطويق لو ينشف الريق = ماتاقف الخطوه واقول الحقايق
لين اعتليك بكل مافي من ضيق = واشكي عليك هموم قلبٍ تضايق
وببيح لك ما لاج خلف المعاليق = واشرح لك اللي صار لي من عوايق
يمكن افضفض عن عنا النفس وافيق = ارتاح لو يا طويق بعض الدقايق
مليت من روتين دنياي ماطيق = همٍ مخلي ضيقة البال عايق
ياعقد نجد اللي رسى بالمشاهيق = مارايق لي غيرك وانا فيك رايق
أنصاك لامليت كل المخاليق = ولاعاد يحلالي كلام الخلايق