ياطير دام أنك على الوكر وبخير=وانا بعد طيب واشوف الطبيعه
والله مافكر بالطيور المشاهير=فعولها وسط المجالس تذيعه
الفعل والبرهان وقت المعابير=للخارم الي دوب ترمق لميعه
اخذت عنك وقمت ترقاء بتغمير=من شوفتك ضاقت عليه الوسيعه
لوكان في خوتك جتني مخاسير=غير الصحاري والخطوط السريعه
نمشي على خدمتك وقت المصافير=لين الشتاء يقفي ويقفي ربيعه
وان شفت فيك خلاف نطلب تقارير=مركز فهد والي يقوله نطيعه
وان جاتنا الربطه ودق المسامير=همن علي موادعه مع وديعه
ويعد لــ النقله جميع الصقاقير=الوسم طاح مضخرات تليعه
والصلب والصمان كله مخاضير=والدبدبه وحمارها والوريعه
والطير توني جذبته بتنسير=مستانسً به عقب هاك القطيعه
ومقناصنا برجوم حاكم الى زعير=هاك الفياض الي شمال الرفيعه
وعقب التعب طحنا على الجره عصير=ربداً خريش وفالمراوغ سريعه
عقب الهدد ضاعت مع الطير تسبير=شفت الطيار وقلت هذا مضيعه
ونخيت بالكنود ربوع مناعير=عقب الوناسه جعل ماهي فجيعه
واخذت ساعه ثم جتنا التباشير=وصارت عقب هاك الترقي مطيعه
والي لقوه منثر الريش تنثير=وقالو تبيعه قلت والله مابيعه
مستانسًَ به مع ربوع مسافير=ربع على المله ودين الشريعه
شرواك يامحمد كعام المصاطير=من روس ربعً فالملاقى فضيعه
وسلامتكم ..
.. محمد الذي ذكر اسمه فـ القصيده هو المقدم محمد العيباني احد زملانا فـ الصقاره وقد على رد على القصيده سوف ننزل رده في ما بعد ....لاحقـاً
وشكرا يابني ميزان وخلطهم