منتديات الموازين الرسميه - عرض مشاركة واحدة

غير متواجد حالياً

لحظة وطن.! مادامك اليوم مهجور
بأمني المنفى..// وأنفي الأماني

( طاحت من أكتاف التعب ).. أربع شهور
وصاحت من أتعاب الكتوف.. / السواني

وصار الحزن شباك../ والصمت ديكور
وبكاي.. ترتيلة مطر .. ( للمواني ) !

والدمع شمع.. ومعظم أحيان../ بلّور
يتمرجح أهدابي/.. ليا من بكاني

كل ما أغني../ يختنق صوت عصفور
وكل ماسكت.. تموت فيني.. أغاني

وكل ما مكاني.. يجفي أصابع النور
أشعل أصابيعي.../ وأجفي مكاني..!

ومن كثر مانا طاغية.. حس وشعور
مابي هلِي.. يدرون.../ اني أعاني

أطاع أبروز ( ضيقتي ) .. فـ آخر السور
الين تبكيني.. السكك../ والمباني

وارجع وألقى ( يا وطن..! ).. ضيق منثور
اسمع.. ولاتنثر دموعك/.. عشاني

طفلتك... ماتملك سوى حلم محصور
وشوية ألعاب/... وحكايا مواني

تحضر غياب.../ وتلتحف.. غيبة حضور
ينسونها../ وتقول: محدٍ نساني

تحلم.. وتخنق حلمها.. وحشة الدور
( والمدرسة /.... وهواش ) أبله تهاني

وعلى كثر.. ما بلل أطرافها../.. النور
تفرد أصابعها..../ وتطفي معاني

وعلى كثر.. ما تترك الصبح.. ممطور
تذبل../ لان الصبح دايم ... أناني

ما مات من برد الصباحات.. عصفور
بس هي ( ماتت ) ../ من كثر ما تعاني