غريبه منك تلعبها على هامان يافرعون=بلاش من اللعانه لعبتك هامان خابرها

توافقتوا على المبدا تخالفتوا على المضمون=وكلٍ قام في راسه يكبرها يصغرها

نقول العيب في الجمره تقول العيب في الغليون=ونبلش فالقضيه ماتدللنا محاورها

غريب اطوار لاصاحي يسمونك ولامجنون=نصدرها توردها نوردها تصدرها

بلاهامان يافرعون مهما رحت مالك عون=عصا موسى على راسك بحول الله يكسرها

بعد عقدة لسانه حلها ممشاه مع هارون=ياويل ارض الكنانه ويل كاهنها وساحرها

يحق الحق والباطل زهق والمعتدي *****=وعجل السامري مع قوم ينهاها ويامرها

على غيك مشيت ودون ظلك عصبةٍ يمشون=تسيرها على شوك الكتاده ماتخيرها

جزاك البحر تغرق فيه واللي معك ما من لون=ليا شافتك جثه هامده هلت عبايرها

تموت ولايغير موت مثلك شي في هالكون=وتحيا والبشر تخمش يديك بروس اظافرها

عرفت انك ضعيف ولانت لافارس ولادندون=ماغير الكبر غرر بك مثل قومٍ مغررها

تحسب اني مثل من جاملوك وعاملوك بهون=لا والله ماهقيت وهقوتك ماني مقدرها

انا راسي عليه رعود وبروق ومطر ومزون=مطلات النجوم أسلب مواقعها واطيّرها

وانا ماتابع المقفي ولانشد حالته وش لون=يجي ويروح ماكنه خِلِق طوعا ولاكرها

وانا ادري وش عليّ وويش ليّ وماقفي مامون =ماتخدعني مظاهر قوم هافيةٍ مخابرها

وانا ماتجاوز حدودي ولاتمرد على القانون=ومن يخطي عليّ اكحل عيونه كحل يجهرها

ولو ينسف بحر(ايجه) ولو ينشف بحر (سيحون)=تجدني بحر بحارته يسرف في بواخرها

مالومك يوم تجهلني يابو راسٍ بدون عيون=ليا جاك البكا تيبس دموعك في محاجرها

تشوف الخيل تحسب سر طنختها من الافيون=عسى الافيون يحقل حيث ماتاطا حوافرها