الجزء الثاني :

احد اصدقائي المقربين قال انه كلم والد وحده بنت فرد عليه الاب دعه ياتيني ويصير خير ( يذكرني بالشرطه اذا استدعوك ) … و تقل خير وشفيه وش عندكم وتطقك ام الركب والعسكري يقلك تعال وتعرف … وتقعد تكلم العسكري ووسطك ينافس وسط فيفي عبدو من الرعشه … طيب وكيف اقدر اجيكم والنفضه تسري في جسمي !!! المشكله اذا رحت لقيت موضوع بسيط …. نرجع لوالد الفتاه الله يثيبه ويثيبها … ورحت له على الموعد اللي حددناه … والرجال بس شافني ويستلمني تحقيق … وليه تبي تتزوج ؟ وبنات الحمايل ماهن لعبة ( اش دعوه يابو الشباب ) … وتقدر تفتح بيت ثاني ؟ وكم راتبك ؟ وايش وضيفتك ؟ وكم بزر عندك ؟ شسم صديقك ؟؟؟ وتدخل غرف دردشه ولا ما تدخل ؟؟ عشان اسأل عنك الاوبات واخلاقك الشاتيه … ( ما درى اني مؤدب ما ادخل غير دردشة الود وقلوب !!!) … وربي حسيت اني امام المحقق كونان وخاصة لا قام يفرك سكسوكته ويوقول اااااااايه بعد كل اجابه اجاوبها …. انما اااااااايه طالعه من زلاعيمه تقل كن كلامي ما عجبه … لكن عموما الانسان يجب ان يستخرج السعاده من قعر كأس التعاسه لذلك قعدت اسلي نفسي بمتابعة تفاحة ادم اللي برقبته وهي طالعه نازله اااااااااااااهب مسرعها .… ماعلينا من هالسالفه …المهم وبعد ان فقع مرارتي والبطين الايسر على البطين الايمن على الاذين الايسر قلت ياعمي بس اذا ممكن اشوف البنيه وتعرف هذا زواج … ياجماعه بغى ياكلني وحسيت اني امام احد ضيوف فيصل القاسم بالاتجاه المعاكس وهو يلوح بيديه الكريميتن اعتراضاً على الشوفه الشرعيه … ثم اردف قائلا لا فض فوه بنيتي عمرها 33 سنه ومدرسه وما عليها زود ( زين زين درينا بس ابي اشوفها لا تطلع شيفه زيك … بذمتكم فيه احد يستلم بضاعه قبل يعاينها !!! … وبصراحه حسيت ان هذا الرجل بيقعد زي العظم ببلعومي لو تزوجت بنته … لا وقاعد متعنطز قدامي تقول ما بالبلد الا هالولد …. لذلك حطيت عليه علامة اكس هو وشروطه اللي كنها شروط منضمه التجاره الدوليه اااااهب عليه


… المهم ان بعض الاباء واقفين بطريق زواج بناتهم ليس عدم اقتناع بمن يأتيه من الخطاب ولكنه تسلط اعمى اهبل وطمع في راتب البنت مما يجعل الفتاة يمر عليها قطار العمر سريعا واخينا في الله لا زال يتشرط ويفرض شروطه التعجيزيه … وهناك فتيات وربي ودهن بالزواج من رجل يحترمها ويقدرها وما يهمها الا ان تبني معه عش زوجيه سعيد لكن ما اخفيكم انهن قله وربي والاكثريه اذا رحت تخطبها تعال شوف الشروط تقول كنك بتتزوج زليخه بنت عبد الفتاح ( مين زليخه عبدالفتاح !!!!!!!! ) … واللي تقلك ابي عرسي بالقصر الفلاني …. اوكي ….. ومهري الشيء الفلاني …. حاااااااضر …. وشهر عسل في مدري فين وتجيب اسماء بلدان على كثر ما قريت بكتاب الجغرافيا حق خامس ابتدائي ما عمري سمعت فيها …. وبرضه حااااااضر … وابي بيت دورين …. انشااااااااا الله … وسهر برا البيت مع اصدقائك مافيه …. احاااااااااول …. وازور اهلي كل يوم …. ستين دااااااااااهيه …..

وتقعد تتشرط وتتشرط لين يمر عليها قطار الزواج ورررررر كنه كامري على طريق الدمام الجبيل … واذا بدأت التجاعيد تضرب باطنابها في خشتها بدأت تولول وتتشكى من شباب البلد الذين لا يقدرون المرأه ويتركونها ليتزوجوا من الخارج وهي من كانت السبب بشروطها التعجيزيه وكأن الزواج مجرد برستيج اجتماعي وليس بداية لحياة كريمه هادئه بدون ديوووون ومشاكل ماليه >>>>> يتبع