الحلقة الرابعه
بعد ان اعياني البحث عن بنت الحلال سواء عن طرق الاهل او الخطابين والخطابات الاحياء منهن والاموات …
وبعد ان تشبعت من شروطهم واللي اصبحت احفظها عن ظهر قلب فبمجرد ما ينطق ولي امر البنت اول جمله اروح خارط له باقي الشروط بحكم الخبره …. وفي رحلة بحثي الميمونه عن الزوجه الثانيه رأيت العجب العجاب … ورأيت بعيني ما كنت اسمعه بأذني واعتبره من المستحيلات … رأيت ن الاصلي لا يزوج التقليد … وبصراحه معليش لا بأس بذلك فكل واحد يبي بنته تركب مرسيدس بقطع اصليه … ولكن الشيء الذي شاهدته ان بعض القبائل العربيه الاصيله لا تمانع بتزويج بناتها من اي قبيلة اخرى اذا كان الرجل محترم واصله طيب وولد حموله بغض النظر عن لقبه الاخير … ووجدت ان بعض القبائل والمتركزه بمنطقه معينه بالجزيره العربيه من الاستحاله ان تزوجك بنتها اذا لم تكم من تلك الحدود الجغرافيه ولو اتيت اليهم بنسبك الى جدك الذي فطس قبل الميلاد … يعني اصل وفصل ولكنك لست من العرق الاري حقهم … بل ان ابناء العم يتدخلون في الامر ويهددون ويزبدون ويرعدون ان تمت هذه الزيجه وممكن يوصلون الدم للركب … مع ان بعض فتايتهم تجاوزن السن الطبيعي للزواج … وكل واحد من عيال العم والاخوان مطخطخ ببيته مع زوجته وعياله واذا وصل الامر لزواج ابنتهم اشتغلت نعراتهم القبليه وممكن يخلونها عمرها كله بدون زواج ولا تاخذ واحد لا ينتمي الى منطقتهم ذات التراب المقدس … وهؤلاء وللأسف لا زالت تعشش في رؤسهم افكار ابي جهل ومن سار على طريقه … وكأن ما يجري في عروقهم دماء اصيله وغيرهم مجرد ملوخيه تجري في عروقه …. لذااااااااا قررت ان ابتعد عن هذه الاجواء المشحونه بالعنصريه والبحث في مواقع الانترنت عن زوجه تدخل نخاشيش مخي من اول الووووه

…. قمت دخلت مواقع الزواج وسجلت بذاك الاسم اللي يطيح الطير من السما وحطيت من ضمن مواصفاتي .. شاب وسيم ( بدينا بالشلخ !!! ) … الطول 188 …أشقر الشعر.. رومنسي ( مع ان السعوديات يقولون ان السعودين ما بهم ريحة الرومانسيه ) … وهواياته ركوب الخيل وجمع الطوابع والسباحه بالمغطس… وعيبي الوحيد طيبة قلبي … المشكله ياجماعه ما لقيت ولا بنت من ديرتنا تقبل التعدد حتى اللي عندها فريق كوره من العيال تقول ابي واحد لسااااا ما تزوج يعني بقراطيسه... واللي تحس انها شينه ويائسه من الزواج تشترط تكون ارمل او مطلق … وما لقيت مصداقيه في كلامهن … وبعد ان كنت ارسل رسايل رومانسيه اصبحت ارسل لهم رسايل استهزائيه اقول فيها ( معاك مواطن كنه كفر وانيت .. تتزوجيني ولا بقررررريح … هاه وش قلتي ؟ ) … طبعا ولا احد يرد علي وكني قاعد أأذن بمالطا … الا يمكن اللي ياذن بمالطا يبلاقي احد يسمعه اما انا وكأني اعزف موسيقى بتهوفن بموقف تكاسي .


ولقيت بعض اخواتنا حاطين شروط وربي ما تنطبق الا على الافغانيين من طول وعرض وجثه وقوه .. انا مدري تبيه زوج ولا بتشغله حمالي بسوق الخضره !!! وكلهن يبون واحد رومانسي ويحب السفر .. طيب رومانسي وااامنا بالله وبنصبر على الشموع اللي بصرف نص راتبي عشان تعبيرين عن رومانسيتك فيها بس السفر هذا مدري قصدها اني اسافر لحالي ولا وهي معاي ؟؟؟ وطبعا شروط في شروط في شروط .... قلت يا ولد طقطق على صبايا البلاد العربيه لعل تختلف نظرتك ايها العنصري لبنت بلادك وربما تجد ضالتك

… وليتني ما طقطقت … وليتني مااااااااااااااا طقطقت … وليتني ماء مااااء ماااااااء طقطقت … وليتني ماااااااااء (( ... طيب ليتني لم لم اطقطق على الديار المزيانه بالزاف وليتني لم اغوص في خبايا تفكيرهن وطيبة قلوبهن وعدم اكتراثهن الا بالرجل الخلوق المحترم بالزاف … وعدم اكتراث الاغلبيه منهن بما يحتويه جيبك … ويبدو اني والعالم الله قد سقطت على صرصور اذني ووقعت ولا حدش سمى عليه

يتبع (باقي الحلقه الخامسه والاخيره وهي زبدة الموضوع )